USA: Umugabo yishwe n’inyoni nini itaguruka yari yoroye

Umugabo w’imyaka 75 y’amavuko wo muri Leta ya Florida muri Leta Zunze Ubumwe za Amerika yishwe n’inyoni itaguruka yo mu bwoko bwa Cassowary yari yororeye iwe.

Umuyobozi wa Polisi y’ahitwa Alachua yabwiye BBC ko bahamagawe ngo batabare ku rugo rw’uyu mugabo kuwa gatanu bagasanga yakomerekejwe bikomeye n’iyo nyoni.

Uyu mugabo witwa Marvin Hajos yajyanywe kwa muganga ari naho yaguye azize ibi bikomere.

Polisi iracyakora iperereza, ariko yatangaje by’ibanze ko ibyabereye aho muri uwo mujyi wa Alachua ari "impanuka ibabaje".

Jeff Taylor wungirije umukuru wa polisi ikorera aho, yabwiye ikinyamakuru Gainesville Sun ati: "Numva ko uyu mugabo yari aho iyi nyoni yari iri akitura hasi. Amaze kugwa iyi nyoni ihita imwahuka."

Umugore watangajwe ko yabanaga na Bwana Hajos yabwiye iki kinyamakuru ko Bwana Hajos yarimo "akora ibyo akunda gukora".

Bwana Hajos ngo yakunze korora amatungo adasanzwe harimo n’agira amahane kuva mu myaka ibarirwa mu macumi ishize.

Inyoni zo mu bwoko bwa Cassowary ni zimwe mu nini kandi ziremereye cyane zo ku isi. Ni inyoni ishobora gupima ibiro 45, igashobora no kwiruka ku muvuduko wa kilometero 50 ku isaha (50km/h). Kuzorora bigombera uruhushya.

Polisi ivuga ko iyi nyoni yishe shebuja yarekewe aho isanzwe iba.

PNG - 611.7 kb
Inyoni zo muri ubu bwoko bivugwa ko zifite amajanja "atyaye nk’inkota"

@Umubavu.com





Tanga igitekerezo kuri iyi nkuru



Igitekerezo