USA: Aba-Démocrates bahigitse Aba- Républicains begukana imyanya myinshi mu Badepite

Aba- Démocrates bihariye imyanya myinshi mu mutwe w’Abadepite, mu gihe aba- Républicains, bihariye iy’abasenateri mu matora y’abagize Inteko Ishinga Amategeko yabaye kuri uyu wa Kabiri.

Muri aya matora biteganyijwe ko imyanya 435 ihatanirwa n’Abadepite na 35 y’Abasenateri ndetse na Leta 36 zigatora ba Guverineri.

Nubwo hari imyanya myinshi itaratangazwa, kugeza ubu abagore 89 bamaze gutorerwa kuba Abadepite bakaba bakuyeho agahigo ka 84 bigeze gutorerwa uyu mwanya. Barimo aba- Démocrates 77, n’aba- Républicains 11.

Ubusanzwe aba- Démocrates bari bafite imyanya 193 mu mutwe w’Abadepite kuri 235 y’aba- Républicains, naho muri Sena bakagira 47 kuri 51 y’aba- Républicains.

Muri rusange imibare iragaragaza ko aba- Démocrates bamaze gutsindira intebe 207, mu gihe aba- Républicains bafite 193 mu mutwe w’Abadepite. Kugeza ubu muri Sena, aba- Républicains bafite ubwiganze bw’imyanya 51, naho aba- Démocrates bakagira 43.

Kuba aba- Démocrates bihariye imyanya myinshi bwa mbere mu myaka umunani ishize, birabemerera kugira ijambo riremereye kuri gahunda za Perezida Donald Trump, nubwo na we ishyaka rye rifite imbaraga muri Sena.

Ubwiganze bw’aba- Démocrates busobanuye ko bashobora gutangiza amaperereza ku butegetsi bwa Donald Trump, ku bijyanye n’ubucuruzi n’ibindi bitandukanye.

Bashobora kandi no kubangamira imigambi ye ijyanye no gushyiraho amategeko harimo n’uwo kubaka urukuta ku mupaka wa Amerika na Mexique.

Biteganyijwe kandi ko Alexandria Ocasio-Cortez azaba ari we ufite imyaka mike mu nteko ingana na 29, Ilhan OImar na Rashida Tlaib, bakaba banditse amateka yo kuba Abayisilamu ba mbere b’abagore bahagarariye za leta mu Nteko Ishinga Amategeko.

Ilhan OImar ahagarariye Minnesota naho Rashida Tlaib ahagarariye Michigan.

Umutinganyi Ms Davids niwe wa mbere mu babyiyemerera uzaba uri mu nteko ahagarariye Kansas. Ayanna Pressley niwe mwirabura wa mbere ugiye guhagararira Massachusetts mu nteko.

PNG - 667.6 kb
Uyu ni Ayanna Pressley, Umwirabura wa mbere ugiye guhagararira Massachusetts mu nteko

@Umubavu.com





Tanga igitekerezo kuri iyi nkuru



Igitekerezo