Abayobozi b’u Bwongereza n’ab’Umuryango w’Ubumwe bw’u Burayi (European Union, EU), basubukuye ibiganiro n’ikizere kinshi ko bashobora kugera ku masezerano, azagenga imikoranire y’impande zombi umunsi u Bwongereza buzaba bumaze kwivana muri uyu muryango, ibizwi nka Brexit.

Nk’uko BBC yabitangaje, biteganyijwe ko Minisitiri w’Intebe w’u Bwongereza, Boris Johnson, ageza ku bagize Guverinoma intambwe imaze guterwa muri ibi biganiro.

Kuri uyu wa Kabiri hacicikanye amakuru ataremezwa ko iby’ibanze mu masezerano byamaze kwemeranywa, ariko Guverinoma iza kuvuga ko amahirwe y’uko byagerwaho muri iki cyumweru arimo kugenda agabanuka.

Biteganyijwe ko uhagarariye EU muri ibi biganiro, Michel Barnier, kuri uyu wa Gatatu ageza kuri ba komiseri ba EU na ba ambasaderi muri uyu muryango, ibimaze kugerwaho.

Minisitiri w’Intebe Johnson arimo gusiganwa n’igihe areba ko amasezerano yakwemezwa, mbere y’uko inama y’iminsi ibiri igomba guhuza abayobozi ba EU, itangira kuri uyu wa Kane. Niyo nama yonyine izahuza abayobozi ba EU mu matariki abanziriza ku wa 31 Ukwakira 2019, ari nayo tariki ya Brexit.

Minisitiri w’Intebe Johnson yakomeje kuvuga ko itariki yo kuva muri EU nigera bigomba kubaho, haba hari amasezerano yemeranyijwe cyangwa ntayo.

Ku wa 19 Ukwakira 2019 nibwo Inteko Ishinga Amategeko y’u Bwongereza izaterana, ari nabwo ishobora gusaba Minisitiri w’Intebe gusaba EU itariki nshya yo kwivana muri uwo muryango, igihe nta masezerano yaba yemejwe.

---

---