Perezida Trump yaburiye ibihugu bizacuruzanya na Iran

Perezida wa Leta Zunze Ubumwe z’Amerika, Donald Trump, yaburiye ibihugu ko ikizakorana ubucuruzi na Iran kizaba kitemerewe kubukorana na Amerika.

Uko kuburira ibihugu kwatangajwe na Trump yifashishije Twitter ubwo yamenyeshaga ko Amerika yongeye gushyiriraho ibihano by’ubukungu Iran.

Yagize ati “Ibihano kuri Iran byamaze gushyirwaho. Ni ibihano bikarishye kurenza ibindi byigeze gushyirwaho ndetse mu Ugushyingo bizafata indi ntera. Umuntu wese uzakorana ubucuruzi na Iran ntazongera gucuruzanya na Leta Zunze Ubumwe za Amerika. Ndabisaba mu guharanira amahoro ku Isi, nta kindi.”

Ibihano Perezida Trump yashyiriyeho Iran byatangiye gushyirwa mu bikorwa kuri uyu wa Kabiri tariki ya 8 Kanama 2018, bireba urwego rw’imari no gutumiza amabuye y’agaciro, bizanakora no ku bucuruzi bw’imodoka n’indege.

Nibigera ku wa 5 Ugushyingo, Amerika izanasubizaho ibihano bikoma mu nkokora ubucuruzi bwa Iran mu rwego rw’ibikomoka kuri Peteroli na gaz, urwego rufatiye runini iki gihugu.

Mu itangazo Amerika yasohoye, Trump yavuze ko Iran ifite amahitamo yo kureka ibikorwa bihungabanya umutekano, igasubira kwisanzura mu bucuruzi mpuzamahanga.

Iran yafatiwe ibihano ishinjwa ibikorwa byo gukora intwaro za kirimbuzi no gufasha iterabwoba.

Perezida wa Irani, Hassan Rouhani, yatangarije kuri Televiziyo y’igihugu ko isubizwaho ry’ibihano by’ubucuruzi kuri Iran ari ugushoza intambara ku gihugu.

Mu gihe Trump avuga ko uzakorana iubucuruzi na Iran azaba yisezereye ku isoko rya Amerika, Umuryango w’Ubumwe bw’u Burayi watangaje ko udashyigikiye ibyo bihano ndetse wemeza ko uzarinda ibikorwa by’ubucuruzi Abanyaburayi bakorana na Iran bikurikije amategeko.

Hagati aho ibigo bimwe by’ubucuruzi byahiye ubwoba ndetse nk’iy’Abadage ikora imodoka, Daimler, yatangaje ko izagabanya ibikorwa byayo ku isoko rya Iran. Icyo cyemezo cyanafashwe n’ibindi bigo byinshi by’abanyamahanga birimo iby’Abafaransa.





Tanga igitekerezo kuri iyi nkuru



Igitekerezo