Nyuma ya Uganda ,Zambia nayo yashyizeho n imisoro kubahamagara bakoresheje Internet

Guverinoma ya Zambia ku wa Mbere yatangaje ko yemeje itegeko ryo kujya yaka umusoro buri wese uzajya uhamagara akoresheje Internet, ibi bikaba biri muri gahunda yo kurinda igihombo ibigo by’itumanaho bisanzwe bitanga serivisi zo kwitaba no guhamagara.

Minisitiri w’itumanaho, Dora Siliya, yatangaje ko guhamagara ukoresheje Internet bizajya bitangirwa umusoro w’amadolari 0.03 ku munsi.
Ati “Inama y’abaminisitiri yasanze hari ubwiyongere bw’abahamagara bakoresheje Internet ugereranyije n’abakoresha telefoni bisanzwe, ibi birori bishobora kubera imbogamizi ibijyanye n’itumanaho n’imirimo mu bigo birimo Zamtel, Bharti Airtel na MTN Zambia.”

Nk’uko The EastAfrican yabyanditse, uyu musoro uzajya utangwa binyuze mu bigo by’itumanaho n’ibicuruza Internet. Siliya avuga ko 80% by’Abanya-Zambia bahamagara bakoresheje Whatsapp, Skype na Viber.

Guvenoma ya Zambia kandi yemeje indi mishinga y’amategeko agamije kugena ibirebana n’imikoreshereze y’imbuga nkoranyambaga, hagamije gukumirwa amagambo abiba urwango, ibyaha bikorerwa kuri internet na film z’urukozasoni.
Abatavuga rumwe na leta ariko bo bavuga ko ikigamijwe ari ukubangamira abakoresha imbuga nkoranyambaga.

Zambia ije ikurikira Uganda nayo iherutse gushyira umusoro ku ikoreshwa ry’imbuga nkoranyambaga, aho kuzikoresha usabwa kwishyura amashilingi 200 (asaga 40Frw) ku munsi, amashilingi 1400 y’icyumweru cyangwa ukishyurira rimwe amashilingi 6000 y’ukwezi.

Ni mu gihe kubitsa cyangwa kubikuza amafaranga kuri telefoni ho ucibwa 1%, aza yiyongera ku yo ukatwa n’ikigo cy’itumanaho ukoresha.

Umubavu.com





Tanga igitekerezo kuri iyi nkuru



Igitekerezo