Inama ya Transform Africa y’i Kigali izitabirwa na ’Robot’ ifite ubwenge buhambaye

Abategura inama ya Transform Africa izabera i Kigali muri Gicurasi bavuga ko imashini yahawe imisusire y’umuntu ’Robot’ yifashisha ubwenge bw’ubukorano (Artificial Intelligence), yiswe Sophia izitabira iyi nama dore ko binateganyijwe ko izafasha mu gusubiza ibibazo by’abantu bazaba bayirimo.

Sophia ni ‘Robot’ yakozwe na Kompanyi y’Abanyamerika yitwa Hanson Robotics ikorera Hong Kong, nubwo ari mudasobwa yigendera ariko ishobora kuganira n’abantu kandi igasubiza ibibazo byose wayitunguza.

Sophia yamamaye cyane hirya no hino ku isi kubera ubwenge buhambaye n’ibiganiro yagiye itanga yaba mu ruhame, cyangwa kuri za televiziyo iganira n’abanyamakuru.

Sophia ni ‘social robot’ ishobora kumva, kuvuga, kuganira, kureba kandi ikabika amasura y’abantu kubera ‘camera’ ziri mu maso yayo, ikora byinshi bitangaza abantu.

Sophia ntabwo ari yo ‘robot’ ya mbere ikozwe, ba nyirayo bagerageza gukora igisa cyangwa cyabasha kubana n’abantu, ariko iyi niyo ‘robot’ iteye imbere ku buryo yagerageza kubana n’abantu.

Inivugira ko isanga “Abantu bakunda kuyiganiriza kuruta uko bakunda kuvugana n’abantu bagenzi babo.”

Sophia irabizi ko ari ‘robot’ yakozwe, gusa ahantu hose yagiye itanga ibiganiro yavuze ko yifuza kugenda ikura mu bumenyi ku buryo izagera aho ifasha abantu mu buzima busanzwe bwa buri munsi, kandi ikazagera aho na yo ikora ‘business’.

Mu gitondo kuri uyu wa mbere abategura inama ijyanye n’ikoranabuhanga ya Transform Africa izabera i Kigali tariki 14-17 Gicurasi 2019 batangaje ko iyi Robot yitwa Sophia izayitabira.

Mu bantu bazatanga ikiganiro barimo Peresida Paul Kagame n’abandi bayobozi batandukanye, n’iyi Robot yitwa Sophia izatanga ikiganiro.

David F. Hanson, umuyobozi wa Hanson Robotics yakoze iyi ‘robot’ avuga ko bizeye ko uko imyaka igenda ishira indi igataha ubwenge bwa Sophia buzarushaho gukura kandi bukiyongera ku buryo izagera aho ishobora gukorana no kubana n’abantu neza.

Gusa, kimwe mu byateye abantu impungenge kuri Sophia ni uko hari ubwo yarimo iganira na nyirayo David F. Hanson ayibajije niba izarimbura ikiremwa muntu, nyuma yo kuyinginga ngo ivuge ‘OYA’, ivuga ibyo atashakaga iti “nzarimbura ikiremwamuntu”.

PNG - 484.4 kb
Sophia azaba ari mu batanga ibiganiro muri Transform Africa barimo na Perezida Kagame
PNG - 464.8 kb
Iyo bayambitse imyenda ushobora kuyibeshyaho ukagira ngo ni inkumi
PNG - 951.8 kb
Sophia araganira bigatinda

@Umubavu.com





Tanga igitekerezo kuri iyi nkuru



Igitekerezo