Leta ya Barbados yatangaje umugambi wayo wo kuva ku Ngoma ya cyami, ikavana Umwamikazi Elizabeth ku mwanya w’umukuru w’igihugu.

Leta y’iki gihugu cyo mu birwa bya Karayibe yavuze ko igihe kigeze ngo "dusige inyuma byuzuye amateka y’ubukoroni".

Iyi leta ifite intego yo kugera kuri ibi mu kwezi kwa 11/2021 ku isabukuru y’imyaka 55 y’ubwigenge yakuye k’u Bwongereza.

Mu ijambo ryanditswe na Minisitiri w’Intebe Mia Mottley, yavuze ko abanye-Barbados bashaka umukuru w’igihugu wo muri Barbados.

Buckingham Palace, ingoro y’Umwamikazi Elizabeth, ivuga ko ibi ari ibintu bireba Guverinoma n’abaturage ba Barbados.

Umunyamakuru wa BBC ukurikirana iby’ibwami avuga ko yabwiwe n’umuntu wo muri Buckingham Palace ko "icyo atari igitekerezo cyaje gutyo gusa", ko cyari "kimaze iminsi kivugwa cyane" muri icyo gihugu.

Iby’ingenzi kuri Barbados:

Kimwe mu birwa bituwe cyane kandi bikize mu bigize Karayibe

 Yabonye ubwigenge ibuvanye k’Ubwongereza mu 1966

 Itegeko Nshinga ryakomeje kwemera leta ikuriwe n’ubwami, Umwamikazi Elizabeth akomeza kuba umukuru w’iki gihugu

 Mbere ubukungu bwari bushingiye ku kohereza isukari mu mahanga, ubu bushingiye ku bukerarugendo n’ishoramari ritandukanye

 Minisitiri w’Intebe Mia Mottley, watowe mu 2018 ni we mugore wa mbere wari utorewe uyu mwanya ukomeye mu gihugu

Ijambo ryatangarijwemo uyu mugambi wa leta ya Barbados ryasomwe ubwo batangizaga imirimo y’Inteko Ishinga Amategeko, ahavugirwa na gahunda nshya za leta.

Mu gihe iryo jambo risomwa n’ufite umwanya w’ubutegetsi wa ’Governor-General’, riba ryanditswe na Minisitiri w’Intebe.

Ijambo ryasomwe ryanditswe na Minisitiri w’Intebe Mia Mottley

Sibwo bwa mbere Barbados yifuje kuva ku butegetsi bwa cyami buyobowe n’Umwamukazi uba i Londres.

Mu 1998, komisiyo yashinzwe kuvugururwa Itegeko Nshinga ry’iki gihugu yari yasabye ko ubwami buvaho hakajyaho Repubulika.

Freundel Stuart, uwo Madamu Mia yasimbuye, na we yari yavuze ko "mu gihe cya vuba bazava mu butegetsi bwa cyami bakaba Repubulika".

Barbados sicyo gihugu cya mbere cyahoze gikoronizwa n’u Bwongereza mu birwa bya Karayibe cyaba gihindutse Repubulika.

Guyana yateye iyi ntambwe mu 1970, hari hatarashira imyaka ine ivanye ubwigenge k’u Bwongereza. Trinidad na Tobago na yo yakurikiyeho mu 1976 na Dominica mu 1978

Ibi bihugu bitatu byose byagumye mu muryango wa Commonwealth, uhuza ibihugu byakoronijwe n’u Bwongereza n’ibindi byashatse kuwinjiramo bidafitanye amateka n’u Bwongereza.

Umwamikazi Elizabeth ni we mukuru w’igihugu kuri iki kirwa kigendera ku bwami, aha yari yasuye Barbados mu 1977

Umwamikazi Elizabeth ubwo yari yakiriye Governor-General wa Barbados, Sandra Masonmu butumire bwihariye, aha bari ku Ngoro y’Umwamikazi izwi nka Buckingham Palace mu 2018

Hakorwe iki ngo tugere ku mibereho myiza y’Abanyarwanda, iyumvire ikiganiro kirambuye UMUBAVU TV ONLINE wagiranye na Madamu Victoire Ingabire Umuhoza, umuyobozi w’ishyaka ritavuga rumwe n’ubutegetsi rya DALFA Umurinzi ariko ritaremerwa n’amategeko mu Rwanda:

---

---