Arasaba ko abahamwa no gufata abana ku ngufu bajya bicwa

Impirimbanyi ikomeye ihagarariye umuryango Dehli Commision for Women (umuryango uharanira uburenganzira bw’abagore) yo mu gihugu cy’u Buhinde, Swati Maliwal, yasabye ko abazajya bahamwa n’icyaha cyo gufata abana ku ngufu bakwiye kujya bicwa mu gihe kitarenze amezi atandatu.

Swati Maliwal yasabye ibi mu ibaruwa yoherereje Minisitiri w’Intebe, Narendra Modi. Madamu Swati Maliwal yavuze ko abantu basigaye bazi ikibazo cy’ifatwa ku ngufu kw’abana ariko ko bitahinduye ibintu cyane cyane mu gihugu cy’u Buhinde.

PNG - 770.9 kb
Madamu Swati Maliwal usaba ko uhamwe no gufata umwana ku ngufu yajya ahita yicwa

Iyo baruwa Swati Maliwal yanditse yari igamije guhurirana n’isabukuru y’imyaka itanu ishize umwana w’umukobwa, Jyoti Singh w’imyaka 23 y’amavuko afashwe ku ngufu n’abantu benshi bikamuviramo no gupfa.

Urupfu rwe rwabaye imbarutso y’imyigaragambyo ikomeye mu gihugu cyose.
Madamu Maliwal ukuriye umuryango Dehli Commision for Women aganira na BBC yagize ati "Nta cyahindutse mu myaka itanu ishize. Dheli iracyari umurwa mukuru w’ifatwa ku ngufu. Mu kwezi gushize, habaye gufata ku ngufu mu kivunge, umwana w’umwaka umwe n’igice yarahohotewe, uw’imyaka irindwi n’undi mukobwa w’umwaka n’igice."

Swati Maliwal yavuze ko ku mpuzandengo, abakobwa batatu n’abagore batandatu bafatwa ku ngufu mu murwa mukuru buri munsi.

Umunyamakuru wa BBC, Jill MacGivering, ushinzwe Akarere k’Amajyepfo ya Aziya avuga ko u Buhinde bwavuguruye itegeko ryabwo nyuma y’imyaka itanu y’imyigaragambyo, isaba kwihutisha imanza z’abaregwa ndetse no guhatira Abapolisi gufata ibirego by’ifatwa ku ngufu nk’ibyaha bikomeye.

Madamu Maliwal yabwiye umunyamakuru wa BBC ko nubwo abantu basigaye bazi iki kibazo, bitatumye gikemuka.

Mu ibaruwa ye, Maliwal ashishikariza Minisitiri w’Intebe gutera indi ntambwe ku buryo abafatwa bahohotera abana bicwa mu gihe cy’amezi y’igihano cyabo.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo