Amerika igiye gukurikiranwa ku byaha yakoze muri Afghanistan

Kuri uyu wa mbere, Umuyobozi w’Urukiko Mpuzamahanga Mpanabyaha (Cour Penal International, CPI) yasabye abacamanza kumwemerera agatangiza iperereza muri Afuganistani ku byaha byo gufata abagore ku ngufu, iyicarubozo ryakorewe abantu byaba byarakozwe n’abasirikare ba Leta Zunze Ubumwe za Amerika n’ikigo CIA cya Amerika gishinzwe iperereza hanze y’igihugu.

Uru rukiko (CPI) rwifuza kandi gukora iperereza ku ba Talibani bashinjwa kuba barakoze ibyaha bibangamira uburenganzira bwa muntu ndetse no ku basirikare ba Afuganistani bashinjwa ibyaha byo mu ntambara.

Ni ku nshuro ya mbere Fatou Bensouda uyoboye CPI afata ingingo yo gukora iperereza ku byaha byo mu ntambara byakozwe n’Abanyamerika no gutangira guhangana na Leta ya Trump.

Leta Zunze Ubumwe za Amerika ntizikibarizwa mu bihugu bifitanye amasezerano n’uru rukiko Mpuzamahanga Mpanabyaha, CPI ariko abaturage bayo bashobora gukurikiranwa ku byaha bakoreye mu bihugu byashyize umukono ku masezerano yashyizeho uru rukiko.

Perezida Bill Clinton wahoze ayobora Amerika niwe wasinye amasezerano y’i Roma yashinze CPI ariko Perezida George W. Bush nyuma yahise ava muri aya masezerano icyo gihe yavuga ko afite ubwoba bw’uko Abanyamerika bashobora kuzarenganywa hagendewe ku mpamvu za politike.

Nta gihe ntarengwa cyatangajwe n’abacamanza ba CPI cyo gutangira gukora iperereza nkuko byari byasabwe na Bensouda (umwe mu banyamategeko ba CPI) gusa bafite guzagera mu mpera z’ukwezi kwa mbere umwaka utaha kugira ngo bazabe bamaze gutanga ibirego byabo abacamanza bazakoreraho.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo
Hakizimana Marcel Kuya 26-11-2017

Andika Igitekerezo Hanno Bazaburanishe na Clington wateje akaga ibihugu by,ibiyaga bigari.