Impunzi zo mu nkambi ya Kiziba zubuye imyigaragambyo, zateraguye amabuye n’ibyuma Abapolisi

Impunzi zo mu Nkambi ya Kiziba icumbikiye Abanye-Congo zongeye kubura imyigaragambyo aho zateraguye amabuye n’ibyuma abapolisi bari ku irondo nkuko Polisi y’igihugu ibitangaza.

Mu butumwa Polisi y’Igihugu yanditse ku rukuta rwayo rwa Twitter kuri uyu wa Kabiri, bugira buti “Polisi y’ u Rwanda ikomeje igikorwa cyo kubungabunga umutekano mu nkambi y’impunzi ya Kiziba, hagamijwe kubahiriza amategeko no kugarura ituze mu mpunzi.”

“Uyu munsi abaturage biganjemo abasore bateye amabuye n’ibyuma abapolisi bakora irondo, 23 muri bo bafashwe bashyikirizwa ubugenzacyaha. Polisi irakangurira impunzi kubaho mu ituze, kubahiriza amategeko no kubaha abashinzwe umutekano nk’abandi baturarwanda.”

Ibi bibayeho nyuma y’umunsi umwe gusa Minisitiri w’Impunzi n’Imicungire y’Ibiza, afashe icyemezo cyo guhagarika komite ihagarariye impunzi mu nkambi ya Kiziba, nka kimwe mu byemezo byo gusubiza ibintu ku murongo n’iyubahirizwa ry’amategeko mu nkambi no mu nkengero zayo.

Ni icyemezo cyafashwe nyuma y’igihe hagaragara ibikorwa by’imyigaragambyo mu nkambi y’impunzi ya Kiziba, igenzura ry’ibanze rikaza kugaragaza ko icyihishe inyuma y’iyo myigaragambyo ari Komite ihagarariye impunzi.

Itangazo rya guverinoma y’u Rwanda rihira riti “Yari ifite inshingano zo gufasha mu inozabikorwa mu nkambi, aho kuzuza izi nshingano, igakomeza gushishikariza impunzi kwigumura ku nzego z’ubuyobozi bwa Leta ndetse n’abafatanyabikorwa; zikababuza kugera mu nkambi, zigateza akaduruvayo mu nkambi, bigateza umutekano muke mu nkambi no mu nkengero zayo.”

Minisiteri y’impunzi yavuze ko “imyitwarire mibi, akaduruvayo n’ubushotoranyi bigaragara mu nkambi ya Kiziba bihabanye n’amategeko kandi ko bigomba guhita bihagarara hagamijwe kugarura amahoro, umutekano no kubahiriza amategeko mu nkambi no gukoresha ibiganiro mugukemura ibibazo bihari.”

Guverinoma y’u Rwanda ivuga ko ifite inshingano zo kurinda umutekano w’Abanyarwanda bose n’uw’impunzi icumbikiye, bityo Minisiteri ikaba ihamagarira impunzi zose gufasha mu gusubiza ibintu ku murongo mu nkambi, kandi ko “uzagerageza kubangamira ishyirwa mu bikorwa ryabyo, azaba yishe amategeko kandi akabihanirwa.”

Mu kiganiro cya Police n’abafatanyabikorwa bayo kuwa Kane tariki 29 Werurwe 2018, mu kurebera hamwe uko umutekano wifashe mu mezi atatu ashize. Umuyobozi mukuru wa Polisi, IGP Gasana Emmanuel yavuze ko n’ubwo hari abaguye mu myigaragambyo y’impunzi zo mu nkambi ya Kiziba abandi bakahakomerekera, ngo byashoboraga kuba bibi cyane hakaba hagwamo benshi ko ahubwo amahirwe ari uko polisi yakoze kinyamwuga mu rwego rwo guhosha imvururu zari zamaze gufata indi ntera.

IGP Gasana yavuze ko impunzi za Kiziba zitwaye nabi cyane muri kiriya kibazo ko ndetse zari zifite imigambi mibisha, ku buryo iyo polisi itaba maso cyangwa ngo ikore kinyamwuga byari kuba bibi cyane.

@Umubavu.com





Tanga igitekerezo kuri iyi nkuru



Igitekerezo
Kwibaza Kuya 2-05-2018

Ariko abo banyekongo mwabasubije iwabo

Nkuko mwasubijeyo abarundi

Baka reka gukomeza kuduteza umutekano mucye!

Mubabitsemo Iki????