Yiturikirijeho gerenade mu rukiko zihitana uwaburanishwaga zikomeretsa n’umucamanza

Ni mu gihugu cya Ukraine aho umugabo utaratangazwa amazina ye yiturikirijeho gerenade ebyiri ubwo yari mu rukiko rubarizwa mu burasirazuba bw’iki gihugu. Iyi gerenade yahise imuhitana ari kumwe n’umwe mu baburanishwaga washinjwaga ibyaha birimo ubwicanyi nk’uko bitangazwa n’igipolisi cyo muri iki gihugu.

Izo gerenade zaturitse ubwo abacamanza n’abaregwa bari mu rukiko bumva urwo rubanza mu mugi wa Nikopol mu ntara ya Dnipropetrovsk mu gihugu cya Ukrine.

BBC dukesha iyi nkuru ivuga ko uyu mugabo wakoze itri bara ari se w’umwe mu bishwe nk’uko inkuru z’igipolizi zibivuga.

Abantu icyenda bakomeretse barimo babiri bashinjwaga icyaha cy’ubwicanyi. abashinzwe umutekano babiri, ndetse n’umukozi umwe w’urukiko.

Abo bagabo batatu bakurikiranwagaho ibyaha by’ubwicanyi aho barashe imodoka bakicamo abantu babiri mu kwezi kwa kabiri muri 2016 barimo n’umwana w’uyu mugabo witurikirijeho izi gerenade nk’uko bivugwa n’ibitangazamakuru bitandukanye.

Mbere yuko uyu mugabo akora iri bara, habanje gucicikana inkuru zivuga ko hari umuntu watoye gerenade akazituritsa ubwo harimo humvwa urubanza rw’ubwicanyi nk’uko biri ku rubuga rwa Ukrainska Pravda. Uru rubanza rwasubirwagamo nyuma yuko abaregwa bari bajuriye nkuko umuvugizi w’igipolisi Yaroslav Trakalo abitangaza.

Uyu mugabo yakoze ibi nyuma yo kumva ko urwo rubanza rwongeye gusubikwa rukazasubukurwa ku wundi munsi. Kuri ubu igipolisi cyatangiye iperereza kuri ibi byabaye.

Intambara zikunze kubera mu burasirazuba bw’igihugu cya Ukraine zituma haboneka imibare myinshi y’abaturage usanga batunze intwaro mu buryo butemewe n’amategeko ari byo rimwe na rimwe biteza umutekano mukeya.

Abantu barenga 10.000 bamaze gupfira muri iyo ntambara yatanguye mu kwezi kwa kane mu mwaka wa 2014, nyuma gato y’aho igihugu cy’ u Burusiya kigaruriye igice cy’amagepfo cy’intara ya Crimee yo muri Ukraine.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo