Yabyariye mu gihuru kubera abaganga bari mu myigaragambyo

Umugore wo mu gihugu cya Uganda yagaragaye abyarira mu gihuru cyo hafi y’ibitaro bikuru bya Kamuli (Kamuli General Hospital) bitewe no kubura umuganga umwitaho nyuma yuko abaganga bose bari bigabye mu mihanda basaba ko umushahari w’intica ntikize bahembwa wakongerwa.

Uyu mugore yafashijwe n’abagiraneza bamubonye abyarira mu gihuru bamushakira umwenda wo kwifashisha nyuma yuko amaze kwibaruka.
Uyu mubyeyi yabuze umuganga wo kumwitaho kuko abaganga bamaze hafi icyumweru bigaragambya banga gukora akazi kabo ngo kugira ngo Leta ibone akababaro bafite k’umushahara bo bita intica ntikize.
Ibi byabaye kuri uyu mubyeyi mu gihe mbere y’iyi myigaragambyo aba baganga bari bavuze ko bazajya bafasha abagore batwite gusa.

Aba baganga bavuga ko bifuza ko Leta ya Uganda yabongerera imishahara bitaba ibyo ntibagaruke ku kazi.

Iyi myigaragambyo y’abaganga mu gihugu cya Uganda yatangiye mu cyumweru cyashize ku itariki ya 06 Ugushyingo bikavugwa ko ikaze cyane kurusha iheruka yamaze hafi iminsi 150.

Aba baganga bigabye mu mihanda mu gihe nyamara Perezida Yoweri Kaguta Museveni yaherukaga kubaburira avuga ko umuganga uzibeshya akajya mu muhanda ashobora guhita yirukanwa ku kazi ndetse akanahura n’ingorane zikomeye mu gihe yaramuka avumbuweho nawe yari mu myigaragambyo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo