Wari uzi ko icyorezo cya SIDA kimaze kwivugana abantu basaga miliyoni 35 ?

Mu Rwanda kimwe n’ahandi hose ku isi, ku itariki ya 01 Ukuboza buri mwaka, ni umunsi mpuzamahanga wahariwe kuzirikana ububi bw’icyorezo cya SIDA. Gusa nubwo uyu munsi washyizweho ngo abantu bose bafatanyirize hamwe kurwanya iki cyorezo kugeza ubu kitarabonerwa umuti n’urukingo, hari abamaze kugikeneka ngo imiti yoroshya ubukana bwacyo irahari birengagije ko kugabanuka k’ubukana atari ukuvurwa burundu. Abenshi baracyayandura iki cyorezo kandi hari n’abo gihitana.

Nkuko Programme y’Umuryango w’Abibumbye yo kurwanya SIDA (UNAIDS) ibitangaza, kugeza ubu icyorezo cya SIDA kimaze guhitana abantu bangana n’abaturage b’igihugu cya Maroc bose hamwe bangana na miliyoni 35 zose. Nubwo bimeze gutya ariko amakuru meza ahumuriza ni uko ugereranyije no mu myaka ishize imibare y’abandura n’abo ihitana iri kugenda igabanuka.

Mu mwaka wa 2016, Programme y’Umuryango w’Abibumbye yo kurwanya SIDA (UNAIDS) yakoze ubushakashatsi bwerekanye ko uyu mwaka warangiye abantu miliyoni 1,8 banduye iyi ndwara yandurira cyane cyane mu guhuza ibitsinda bidakingiye.

Ibi bivuze ko abantu 5000 ngo banduraga buri munsi kandi 2/3 by’ubwandu bushya bukaba muri Africa.

Kuva 2010 kugeza 2016 ubwandu bushya bwa SIDA ku isi yose UN ivuga ko bwagabanutseho gato, buva kuri miliyoni 1,9 bugera kuri 1,7 ku mwaka.

Amakuru meza ariko ni uko ubwandu bushya ku bana (bavanye kuri ba nyina) bwagabanutseho 1/2 kuva 2010 kugeza 2016. Niba batagiye kwandura ari bakuru !!
Mu bana ngo abagera ku 300 000 banduraga buri mwaka, 2016 ngo handuye 160 000.

Ibi ngo ni umusaruro wo gukurikirana abagore batwite bakarindwa kwanduza abana no mu gihe cyo kubyara.

Kugeza 2016 irangira abantu miliyoni 40 ku isi babana na SIDA ku mibare ya UNAIDS.

Iyi mibare ngo yakomeje kwiyongera kuko kwanduzanya biciye mu mibonano mpuzabitsina idakingiye bitahagaze.

Abicwa na SIDA cyangwa ibyuririzi byayo nabo ngo baragabanutse cyane bigera kuri 50%, kubera ko mu bihugu biri mu nzira y’amajyambere aho ubwandu ari bwinshi imiti igabanya ubukana bayibona bitagoye cyane.

Uyu munsi abantu bagera kuri miliyoni 20,9 babona imiti igabanya ubukana bwa Virusi itera SIDA ku isi yose.

Mu mwaka wa 2005 abantu bagera kuri miliyoni 1,9 bapfaga buri mwaka kubera SIDA. Mu 2016 uwo mubare wari waramaze kumanuka cyane kuko wari wageze ku miliyoni imwe.

UNAIDS ivuga ko kuva SIDA yagaragara mu 1981 imaze kwica abantu miliyoni 35, zingana n’abatuye Maroc ubu. Kuva icyo gihe abamaze kuyandura bose hamwe ni miliyoni 76,1.

Iyi ni imibare y’ababa baripimishije bakamenya aho bahagaze. Wowe uhagaze ute uyu munsi ?Iki ni ikibazo buri wese yakagombye kwibaza bityo agafata umwanzuro wo kureba uko ahagaze kugira ngo amenye ingamba afata bitewe n’uko yasanze ahagaze.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo