Umukobwa yemeye gukeba inyama ku mubiri we ngo bayitere ku mubyeyi we avurwe

Ni mu gihugu cy’u Buhinde mu mugi wa Mumbai aho umwana w’umukobwa witwa Pooja Bijarnia yemeye gufata icyemezo cyo kwikebaho inyama ku mubiri we ku gice cyo ku nda kugira ngo arokore ubuzima bw’umubyeyi we kuko yari ikenewe ngo bayitere kuri ise umubyara abone gukira aho yari arwaye.

Iyi nkuru yamenyekanye nyuma y’ifoto yasakaye ku mbuga nkoranyambaga zitandukanye igaragaza aho uyu mwana w’umukobwa yikebye inyama yo guterwa ku mubyeyi we kugira ngo avurwe ndetse ikanagaragaza aho uyu mubyeyi yayitewe ku nda ye.

Uyu mwana yafotowe na se iyi foto ayishyira ku mbuga zitandukanye ashaka kwerekana uburyo uyu mwana we amurokoye urupfu rwashoboraga kumuhitana.

Uyu mukobwa wiswe intwari bitewe no kwemera gukebwaho inyama ku mubiri we ibyo bamwe na bamwe batakwemera, agaragara ari kumwe na se bafite akanyamuneza nyuma yuko bamaze kuvurwa ibikomere by’aho babazwe.

Mu cyumweru gishize nibwo umuganga witwa Rachit Bhushan Shrivastva nawe yasize amafoto y’uyu mwana n’umubyeyi we ku mbuga nkoranyambaga zitandukanye anandikaho ubutumwa agira ati “hari abantu bamwe na bamwe bafatwa nk’intwari mu buzima ariko uyu mwana w’umukobwa ntawakumva uburyo yarokoye ise nta bwoba agize bwo gukebwaho inyama ibyo umuntu wese yakumva ko bidashoboka. Hari abantu usanga bavuga ngo abana b’abakobwa ntacyo bamaze ariko iki ni igisubizo bahawe. Uyu mwana w’umukobwa ntazi neza yabaye intwari ntagereranywa ku bwo kwemera gukebwaho inyama ku mubiri we agamije kurokora ubuzima bw’umubyeyi we. Ndakwishimiye cyane mukobwa kandi hari byinshi nkwigiyeho. Imana igihire Pooja Bijarnia”.

Iyi nkuru yasesekaye cyane ku nkuta za Facebook abantu benshi batangarira uyu mwana w’umukobwa w’intwari idasanzwe.

Abantu benshi kandi byabakoze ku mutima bamushimira cyane ku butwari ntagereranywa yagize yemera kubagwa atarwaye ahubwo afite intego yo kurengera umubyeyi we.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo