Uganda : Umuganga uzibeshya akajya mu myigaragambyo azabona ishyano

Ku munsi wa Kabiri tariki ya 31 Ukwakira 2017, mu nama y’abagize urugaga rw’abaganga na Perezida wa Repubulika ya Uganda, Yoweri K. Museveni yabwiye abagize uru rugaga ko hagiye gushyirwaho amategeko akarishye ndetse akanafunga abaganga bazibeshya bagafatirwa mu myigaragambyo yabo iteganijwe mu cyumweru gitaha bitewe n’ikibazo cy’umushahara bagenerwa.

Umuyobozi w’uru rugaga rw’abaganga mu gihugu cya Uganda yatangaje ko ibi byose Museveni yabivugiye mu nama bagiranaga nawe ku munsi wa Kabiri nubwo ushinzwe amakuru mu biro bya Perezida Museveni we yabihakanye yivuye inyuma.

Amakuru aravuga ko Perezida Museveni ngo yaba yinjiye muri iki kibazo kugirango aburizemo icyari kuba nk’akaga mu gihugu mu gihe abaganga bo mu bitaro bya Leta ndetse n’ibigo nderabuzima bagira icyarimwe mu myigaragambyo.
Ukuriye ishyirahamwe ry’abaganga muri Uganda yavuze ko Perezida Museveni yamwihanangirije we n’abagenzi be ko azatangaza ibihe bidasanzwe kandi agata muri yombi abaganga niba bakomeje umugambi wabo wo kwitabira imyigaragambyo idasanzwe kuwa mbere utaha.

Gusa Leta yahakanye iri terabwoba rivugwa ivuga ko inama yabaye mu mwuka w’ubusabane.

Kuri iki kibazo cy’imishahara abaganga bamaranye iminsi, Museveni yabemereye ivugururwa ry’imishahara yabo ndetse hakazanakurikiraho izindi nama kuri iki kibazo.
Abagize ishyirahamwe ry’abaganga ngo bagomba kongera guhura kuwa mbere kugirango barebe niba bakomeje umugambi wabo wo kwigaragambya cyangwa niba bawuburizamo nyuma y’ubu butumwa bwatanzwe n’umukuru w’igihugu.

Abaganga barinubira umushahara muto ndetse n’ibura ry’imiti n’ibikoresho zituma habaho impfu zashoboraga kwirindwa.

Umuganga ufite umushahara wo hejuru kurusha abandi muri Uganda ahembwa amashiringi angana n’amadolari igihumbi gusa ku kwezi (1000$ ku kwezi).

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo