Oprah washoze ari umugore wa Katauti yageze I Kigali kwifatanya n’umuryango we mu kababaro

Irene Pancras Uwoya (wamamaye nka Oprah muri filime yahuriyemo na Kanumba) yageze mu Mujyi wa Kigali mu masaha ya mu gitondo kuri uyu wa 15 Ugushyingo 2017 kwifatanya n’umuryango wa Ndikumana wahoze ari umugabo we bagatandukana byeruye muri Gashyantare 2017.

Ndikumana Hamad Katauti, ni umwe mu bakinnyi bakanyujijeho mu mupira w’amaguru hano Rwanda akaba yitabye Imana mu ijoro ryo kuri uyu wa 14 Ugushyingo 2017 azize urupfu rutunguranye.

Umwe mu muryango wa Ndikumana Katauti yabwiye IGIHE dukesha iyi nkuru ko Irene Uwoya (usigaye witwa Sheilla nyuma yo guhindura idini abisabwe na Dogo Janja barushanganye) yaje aherekejwe na bake mu nshuti ze bari banasanzwe bagenderera urugo rwabo akiri umugore wa Katauti.

Uwoya Oprah nta kintu aratangaza ku rupfu rwa Ndikumana Katauti haba ku mbuga nkoranyambaga akoresha no mu itangazamakuru ry’iwabo muri Tanzania.
Biteganyijwe ko Ndikumana Katauti ashyingurwa ku isaha ya saa cyenda n’igice[15h30] mu irimbi ry’i Nyamirambo ahitwa mu Gatare.

Mu myaka igera ku munani Katauti na Oprah bamaranye bagiye bagirana amakimbirane ndetse mu 2011 bigeze gutandukana ariko imiryango irabunga. Muri Gashyantare 2017, umubano wabo warahagaze burundu ndetse mu minsi mike ishize Oprah yarushinganye n’umuraperi Abdulaziz Chende[Dogo Janja].
Katauti yari afite urwibutso kuri Oprah Uwoya...

Mu kiganiro kirambuye aherutse kugirana na Radio Rwanda yavuze ko mu myaka 37 yari amaze ku Isi afite ku mutima cyane ibihe yagize mu 2009 ari nabwo yarushinganye n’umukinnyi w’icyamamare muri sinema ya Tanzania, Irene Pancras Uwoya.

PNG - 857.5 ko
Uwoya n’umuhungu yabyaranye na Katauti


Katauti yavuze ko Uwoya akiri umugore we ngo bagiranye ibihe byiza gusa urwibutso amufiteho rw’iteka ngo ni uburyo yamwitagaho, by’umwihariko azirikana cyane uburyo uyu mugore yamuzaniraga icyayi mu buriri.

[Aseka cyane] ati “Icyo ntazapfa nibagiwe, ni ukuntu yamfataga buri gitondo, yanzaniraga icyayi mu gitondo nkiryamye akambyutsa, ni kimwe mu bintu ntazapfa nibagiwe.”

Irene Pancras Uwoya na Hamad Ndikumana ‘Katauti’, ubukwe bwabo bwatashye kuwa 11 Nyakanga 2009 , ibirori byabereye kuri Hoteli ya Giraffe View, iherereye Mbezi Kawe, mu Mujyi wa Dar es Salaam.

Uwoya[uzwi nka Oprah] aheruka gusezerana bwa kabiri n’umuraperi witwa Dogo Janja, Katauti na we yari amaze iminsi ahishuye umukobwa witwa Asma Jesca wo mu Burundi bari bakomezanyije urugendo rw’urukundo. Amakuru yari ahari yavugaga ko biteguraga kurushinga.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo