Nyuma yo kwandagazwa kuri Instagram, arifuza urupfu

Umunyamideli Wema Sepetu wigeze kugacishaho ubwo yakundanaga na Diamond ndetse wigeze no kwegukana ikamba rya Miss w’igihugu cya Tanzaniya mu mwaka wa 2006, nyuma yo kwandagazwa na bamwe mu bamukurikirana kuri Instagram bamutuka, yatangaje ko yifuza gupfa akaruhuka ibitutsi n’imivumo asabirwa, akanaruhuka gukomeza gukoresha imbuga nkoranyambaga.

Wema Sepetu atangaje ibi mu gihe yaherukaga mu Rwanda akanitwa umwamikazi wa Instagram. Aya magambo uyu munyamideli yatangaje yakuye benshi imitima bagendeye ko mu gihe umuntu yifuza gupfa ibintu biba byageze kure nkuko the Global Publishers dukesha iyi nkuru babyanditse.

Uyu mukobwa uherutse gutangaza ko atifuza kubyara, avuga ko yifuza gupfa kugirango aruhuke umuruho aterwa n’imbuga nkoranyambaga ahanini bitewe n’ibitutsi yakirizwa iyo agize icyo akora ku mbuga nkoranyambaga.

Uyu munyamideli Wema Sepetu ushinjwa gukoresha ibiyobyabwenge ndetse no mu minsi ishize akaba yarahamagajwe mu rukiko akabura, yanditse kuri instagram avuga ko agiye gufata igihe akareka kwandika no gushyira amafoto kuri instagram kugirango arebe ko atakomeza gutukwa ku mbuga nkoranyambaga.

Wema Sepetu mu magambo ye yanditse agira ati “Hari igihe nzapfa kuko nta muntu uzabaho iteka, ariko sinzi niba muzakomeza kumvuga nabi no kuntuka ibitutsi by’ibyo muntuka cyangwa niba muzavuga ngo nari meze gutya na gutya mwarangiza mukarenzaho ngo ngire iruhuko ridashira.”

Uyu mukinnyi w’amafilimi yakomeje avuga ko igihe kimwe azapfa kandi ko ahamanya n’umutima we ko Imana izamwakira mu ijuru.Ati “ Igihe kimwe nifuza ngo Imana inyitwarire mpfe … Iby’isi ni byinshi… Hariho n’ikindi gihe nsaba Imana ngo nkomeze kubaho kuko mba nziko ibi bimbaho nabyo bizashira… Ndatekereza nkeneye igihe runaka ntari ku mbuga nkoranyambaga…. Ariko nanone… simbishoboye.”

Ku gicamunsi cyo kuri uyu wa 29 Ugushyingo 2017, nibwo iyi nkuru yatangiye kugaragara mu binyamakuru bitandukanye inkuru yafashwe nk’ibabaje hagendewe ku kuba uyu munyamideli yarageze aho yifuza urupfu kubera gutukwa.

PNG - 766.8 ko
Aya ni amagambo Wema Sepetu yanditse kuri Instagram ye


Wema Sepetu atangaje ibi nyuma yo kwibasirwa mu bitutsi bikabije bitewe n’uko umunyarwenya akaba n’umukinnyi w’amafilime Steven Nyerere yatangaje ko agiye gusubira mu ishyaka riri ku butegetsi CCM (Chama Cha Mapinduzi) yari yaravuyemo.

Uyu munyamideli akaba n’umukinnyi w’amafilimi wamamaye mu gihugu cya Tanzaniya, Wema Sepetu aherutse mu Rwanda ubwo yari yitabiriye igitaramo cy’abakoresha Instagram kiswe “KFM Instagram Party”.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
Nshimiyimana David Kuya 1er-12-2017

Bajye bagabanya

Nshimiyimana David Kuya 1er-12-2017

Bajye bagabanya