Nigeria : Abantu 50 bahitanywe n’igitero cy’umwiyahuzi

Igipolisi cya Nigeria cyavuze ko abantu bagera kuri 50 bapfuye mu gitero cya bombe yaturikijwe n’umwiyahuzi mu mujyi wa Mubi uherereye mu majyaruguru ashyira uburasirazuba bw’igihugu cya Nigeria.

Umuvugizi w’igipolisi yavuze ko uretse aba bantu 50 bahitanywe n’iki gitero, abandi benshi nabo bahakomerekeye. Umwiyahuzi witurikirijeho igisasu yari mu musigiti mu gitondo cyo kuri uyu wa kabiri. Abantu babashije kugera ahabereye iri bara batangaje ko bahasanze imibiri yashwanyaguritse

Mubi ni umwe mu migi yo mu gihugu cya Nigeria uherereye mu ntara ya Adamawa, aho abarwanyi b’umutwe ugendera ku matwara akaze ya Islamu Boko Haram bakorera.

Umutwe wa Boko Haram wakajije ibitero by’ubwiyahuzi nyuma yaho igisirikare cyigaruriye akarere kagenzurwaga n’uyu mutwe.

Ibikorwa by’iterabwoba by’umutwe wa Boko Haram bimaze imyaka isaga umunani yose mu majyaruguru y’igihugu cya Nigeria, ibi bikaba bimaze gutuma hapfa ibihumbi n’ibihumbi by’abaturage mu gihe miliyoni z’abandi bakurwa mu byabo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo