Mu Rwanda hatangijwe uburyo bushya bwo kwipima Sida utiriwe ujya kwa muganga

SIDA (HIV self-testing), hakoreshejwe agakoresho kabugenewe umuntu acisha mu kanwa, bitandukanye n’uburyo bwari busanzwe bwo gupima amaraso yo mu mutsi.

Ubwo buryo bwatangijwe kuri uyu wa Gatanu tariki ya 1 Ukuboza 2017, ubwo mu Rwanda hizihizwaga umunsi mpuzamahanga wo kurwanya Sida.

Ako gakoresho ngo umuntu agacisha mu kanwa ku ishinya kakajyaho amacandwe, yagakuramo,akakanyuza mu gacupa karimo umuti usa n’amazi, igisubizo kikaboneka nyuma y’iminota 20.

Kugira ngo umenye ko ufite Virusi itera Sida ngo nyuma y’iminota 20 ubona kuri ka gakoresho hajeho uturongo tubiri dutukura, waba utayifite hakazaho akarongo kamwe gatukura.

Ako gakoresho gakoreshwa inshuro imwe gusa kagahita kajugunywa. Ubu ngo ntikarashyirwa ku isoko, ariko mu minsi mike kazaba kagejejwe ku isoko, aho kazajya kagurwa 5000 FRW kagakoreshwa rimwe.


Impuguke mu kurwanya Sida zivuga ko uburyo bushya buzatuma hamenyekana imibare nyayo y’abagendana agakoko kuko hari abatinyaga kujya kwipimisha kwa muganga .

Dr. Ndagijimana Jean de Dieu ni umwe mu bakurikirira hafi icyago cya Sida mu kigo cy’igihugu cy’ubuzima ati"Umuntu yipima anyujije mu kanwa, bikamwereka ko yanduye cyangwa atanduye agakoko. Ku bantu badashobora kugera kwa muganga, umuntu avuga ati jyewe ndi ku kazi cyangwa se n’umugabo n’umugore batabona igihe cyo kujyana kwa muganga bashobora kukagura. Bashobora kuvuga bati reka tukagure turebe uko duhagaze"



Tanga igitekerezo kuri iyi nkuru



Igitekerezo
-xxxx- Kuya 4-12-2017

Andika Igitekerezo Hanno akogakoresho nikeza ariko karahenze iyabs nibura katakoresheaga rimwe ryonyine in Bosco iGatsibo