Menya ko mu igihe ushakanye n’umuntu mudahuje amaraso mushobora kurinda mutabaruka mutabyaranye

Ntabwo ari byiza ko ushakana n’umuntu utazi niba muhuje amaraso nubwo abenshi usanga aribyo bikorera ariko byakabaye byiza mubanje kubimenya mu buryo bwo kwirinda ingaruka zabyo nyuma. Nyamara nubwo tuvuga ibi ahubwo hari n’abo usanga batanazi n’amaraso yabo mbere yo kumenya ay’abo bagiye kurushingana. Ibi ni bibi cyane kuko bishobora kugukururira ibyago byo gupfa nta kana ubyaranye n’umukunzi wawe wikundira.

Muri bimwe mu biranga amaraso harimo ibyitwa Rhesus, utu tukaba ari uturemangingo dutandukanya amaraso akaba ari natwo tugiye kwibandaho.

Rhesus ni iki ?

Mu turemangingo dufasha mu bwirinzi, habonekamo utuzwi nka D. Utwo rero nitwo twahawe izina rya Rhesus bitewe nuko uwatuvumbuye ariko yitwaga.

Iyo ku nsoro zawe zitukura (red blood cells/globules rouges) hasanzweho utwo turemangingo, bivuze ko iyo udifite witwa Rhesus positif (Rh +) waba utadufite ukitwa Rhesus negatif (Rh -).

Ubushakashatsi bwerekanye ko abantu barenga 80% bafite Rhesus (ubwo ni Rh+), naho abasigaye ni Rh- (nta rhésus bafite).

Amatsinda y’amaraso twayavuga dutya :
A+ na A-
B+ na B-
AB+ na AB-
O+ na O-

Iyi rhesus rero igira uruhare mu gutanga amaraso kuko iyo ufite Rh- ntiwaterwa amaraso ya Rh+. Gusa uwa Rh+ we atewe aya Rh- nta kibazo.

Ese Rhesus ihuriye he no gutwita ?

Tubanze tumenye ko iyi Rhesus uyihabwa n’ababyeyi ukomokaho. Iyo umugore ari Rh- naho umugabo akaba Rh+ umwana ashobora kugira Rh+ akomoye kuri se. Iyo hagize amaraso y’umwana yambuka ingobyi akivanga n’aya nyina, umubiri w’umugore uhita ukora abasirikare bo kurwanya iyo Rh+ kuko uba ubona ari ikintu kije kugirira nabi umubiri.

Akenshi rero umwana wa mbere avuka neza kuko amaraso y’umwana aba atarahura n’aya nyina ngo bitume habaho ikorwa ry’abo basirikare. Gusa mu kuvuka kwe, iyo bagenya urureri ruba ruhuza umwana na nyina hari amaraso basubiza inyuma. Ayo rero niyo atuma umubiri wa nyina ukora ba basirikare.

Ubusanzwe amaraso y’umwana ntahura n’ayumwana ku buryo bweruye kuko ingobyi umwana aba arimo iba igomba kurinda umwana uri munda, maze aho kureka amaraso yose ya nyina yivanga n’ayumwana igahitamo guhitisha ibyo umwana akeneye gusa biri mu maraso ya nyina. Bimwe mu bishobora kwambukiranya ingobyi maze bikinjira mu mwana twavuga nk’intungamubiri ziba zigomba kurenga uyu mupaka kugirango zibashe gutunga umwana bityo akure ndetse n’abasirikare bari mu maraso y’umubyeyi kuko nabo bafasha umwana uri munda kugira ubwirinzi ku ndwara zitandukanye. Ni yo mpamvu umubyeyi wamaze gukora abasirikare bo kurwanya Rh+ iyo atwite umwana ufite Rh+ adashobora kuvuka kuko aba basirikare iyo bageze mu maraso y’umwana barayangiza cyane dore ko ari nacyo baba barakorewe.

Aha rero twavuga ko iyo bitamenyekanye mbere umubyeyi ufite Rh- nyuma yo kubyara umwana ufite Rh+ adashobora kongera kubyara undi mwana ufite iyi rhesus kuko inda y’uyu mwana idashobora kugeza igihe cyo kuvuka kuko ivamo mbere cyangwa umwana akaba yavuka yapfuye.

Aha rero ni naho hashobora kuvukira ikibazo cyo kutazigera mubyarana umwana mu gihe inda ya mbere yaba ivuyemo cyangwa umwana wa mbere agapfa kandi ababyeyi bombi batazi ko bafite ikibazo cyo kudahuza amaraso. Iyo inda zoze zikurikiyeho zibaye Rh+ birumvikana ko muba mudashobora kugira umwana mubyarana mwembi.

Ni gute byirindwa ?

Kwa muganga iyo bamenye ko utwite umwana wa Rh+ wowe uri Rh-, inda itararenza ibyumweru hagati ya 28 na 32 bagutera urushinge rurinda ko inda ikurikiyeho yazavamo (Anti-D cg immunoglobulin). Iyo bimenyekanye umaze kubyara bagomba guhita bagutera urwo rushinge utararenza amasaha 72 (iminsi 3) ubyaye.

Ese umugabo ufite Rh+ yashakana n’umugore ufite Rh- ?

Yego rwose. Gusa aba agomba kubivuga kwa muganga kugirango bazamufashe akibyara. Umugore wa Rh- kandi aramutse akuyemo inda cg aviriye ku nda irengeje ibyumweru 20 agomba kujya kwa muganga bakareba niba yari atwite umwana ufite Rh+. Bityo bakamuha urwo rushinge.

Mu gusoza iyi nkuru twagira inama buri muntu wese utaripimisha kubikora kugirango amenye amaraso ye kuko uretse no mu gihe cyo kubyara cyangwa gushaka binafasha mu gihe umuntu arwaye akaba akeneye guhabwa amaraso. Sangiza iyi nkuru incuti zawe zitagwa muri iki kibazo kubera ubutamenya.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
Ndongozi Kuya 18-10-2017

Twungutse byinshi kuko ababyeyi benshi bibayeho bikoma abo baba bafitanye amakimbirane ko babaroze kandi tubonye imfashanyigisho,murakoze Daniel.