Menya ibihugu bikoresha urumogi rwinshi ku isi unasobanukirwe ingaruka zikomeye rugira ku buzima bwa muntu

Urumogi ni kimwe mu biyobyabwenge bikaze kandi bikunze kurwanywa cyane ku isi ariko kandi ntibibuze ko hari benshi babirengaho bakarunywa rwihishwa. Iki kiyobyabwenge gikunze kurwanywa na benshi, kigira ingaruka mbi ku buzima by’umwihariko ubwo mu mutwe nkuko byanagaragaye ko kigira n’izo ku mikurire y’umubiri w’umuntu.

Dr. Syed Shakeel Raza Rizvi wo muri Kaminuza y’ubuhinzi ya Pir Mehr Ali Shah Rawalpindi yo muri Pakistan ari nawe wayoboye ikipe y’abashakashatsi bakoze ubu bushakashatsi kuri iki kiyobyabwenge avuga ko: “urumogi rutera umubiri kuvubura imisemburo yongera imikurire y’ubugabo, rukagabanya imisemburo ituma umubiri ukura.”

Aba bashakashatsi biga kuri iki kiyobyabwenge bibanze ku kureba itandukaniro ry’ivuburwa ry’imisemburo yongera ubugabo n’imisemburo itera gukura mu maraso maze babukorera ku bahungu 220 batanywa iki kiyobyabwenge n’abandi 217 bokamwe nacyo nk’uko ikinyamakuru Telegraph cyanditse iyi nkuru kibivuga.

Imisemburo yongera ubugabo nka Testosterone n’umusemburo utuma hakorwa intanga uzwi nka LH (Luteinizing Hormone) basanze ivuburwa ku kigero cyo hejuru ku bantu banywa iki kiyobyabwenge kurenza abatakinywa. Ndetse kuri aba bantu, imisemburo itera umubiri gukura yo iba iri hasi.

Ikindi cyagaragaye kuri aba bantu bakoreweho ubushakashatsi, ni uko ku bantu batanywa iki kiyobyabwenge byagaragaye ko barusha abo cyokamye ibiro 4 nibura, ndetse na santimetero nibura 11 ku kigero cy’imyaka 20.

Aba bashakashatsi kandi bagaragaje ko ivuburwa ry’imisemburo ya Cortisol itera umunaniro (stress) iba iri ku kigero cyo hejuru ku bantu banywa iki kiyobyabwenge.

Dr Rivzi avuga ko izi ngaruka zidakora ku buzima gusa, ahubwo zikora no ku mibereho mu buzima busanzwe dore ko uko umuntu yiyumvamo ubugabo ari nako yumva kuri we hariho inshingano zijyanye n’uko yiyumva kandi igihe kitaragera.

Ibi ngo bishobora gutuma umuntu ufite izi ngaruka, kubera kwiyumvamo ubukure adafite, yashaka kugendana nabwo bityo bikaba byamutera gushaka kugera kubyo atakagombye kugeraho nko kurongora, aho bishobora kumutera gufata ku ngufu…

PNG - 997.2 kb
Nubwo ubushakashatsi bwerekanye ingaruka zikomeye z’urumogi ku buzima bwa muntu ntibibuza bimwe mu bihugu kurukoresha nta nkomyi

Dore ibihugu bikoresha urumogi rwinshi ku isi bititaye ko ruteza ingorane zikomeye ku buzima bwa muntu nkuko byagaragajwe n’ubushakashatsi tumaze kubona hejuru:

Lesotho

Urumogi muri Lesotho rwemewe gukoreshwa nk’umuti gusa ariko kandi rukanahingwa cyane muri iki gihugu.

Mu myaka ya 2000, habaruwe ko 70 ku ijana by’urumogi rukoreshwa muri Afrika y’Epfo ruva mu gihugu cya Lesotho.

Abahinzi b’urumogi bo muri iki gihugu usanga barukoresha iwabo mu ngo no kurugurisha mu bindi bihugu bituranyi bikenura. Abahinzi bato bato bo muri iki gihugu kandi usanga bahinga urumogi mu yindi myaka nko mu bigori, kugira ngo babone urwo nabo bajya kugurisha muri Afrika y’Epfo.

PNG - 1.2 Mb
Mu gihugu cya Lesotho usanga abahinzi bavanga urumogi n’indi myaka batitaye ku ngaruka rugira

Afurika y’Epfo

Afurika y’Epfo nicyo gihugu nacyo cyitezwe mu minsi iri imbere ko kizatangira gukomorera abantu gukoresha urumogi ku mugaragaro.
Mu kwezi kwa kane k’umwaka ushize, iki gihugu cyemereye abantu gukoresha urumogi mu ngo iwabo gusa ariko nticyabemerera kuruhinga no kurugurisha.

Kuva mu kwezi kwa gatatu muri 2017, nyuma y’aho urukiko rukuru rwa Western Cap rwemereye gukoresha urumogi mu ngo, n’ubu biracyabujijwe kurukoresha mu mategeko, kugeza ubwo amategeko azahindurirwa kugira ngo abahinzi batangire kuruhinga, kurugurisha ndetse n’amashyirahamwe akore ibikoresho bijyanye n’urumogi yewe no kurukwirakwiza hirya no hino nta nkomyi.

Nyuma yuko amategeko akomoreye ikoreshwa ry’urumogi mu ngo, mu gihe cy’amezi atari make, abahise bahinga urumogi muri Afurika y’Epfo bateye imbere cyane, bugururira amarembo n’abandi bashaka kuruhinga kugira ngo haboneke urukoreshwa nk’umuti.

Ghana

Amakuru atangazwa na ONU avuga ko Ghana aricyo gihugu gikoresha urumogi rwinshi ku isi kuko 21.5 ku ijana by’abaturage bari hagati y’imyaka 15 na 64 barunywa cyane batarubabariye.

Ku munsi mpuzamahanga wahariwe kurwanya ibiyobyabwenge, habaye ibiganiro ku rwego rw’igihugu bireba uburyo hakwemezwa ikoreshwa ry’urumogi ariko ntibyagira icyo bigeraho.

Ubutegetsi bwo muri iki gihugu buvuga ko urumogi ari ikintu kibi cyane kurusha n’inzoga zikomeye bityo ko mu gihe hakwemezwa kurukoresha haboneka ingaruka mbi zarwo zagorana guhangana nazo.

Nyamara nubwo igihugu cya Ghana kivuga ibi, ntibikibuza gufatanya n’ibindi bihugu byo mu karere ka Afurika yo mu burengerazuba mu gukoresha urumogi no kuruhanahana muri ako karere.

PNG - 834.4 kb
Igihugu cya Zimbabwe nacyo cyemeye guhinga no gukoresha urumogi

Koreya ya Ruguru

Muri Koreya ya Ruguru urumogi ni imari ikomeye cyane dore ko ho unasanga hari n’amashirahamwe ya Leta ajya kurugurisha mu bindi bihugu kugira babone amafaranga menshi.

Abashakashatsi bavuga ko bitazwi neza ko haba hariho amategeko abuza ikoreshwa ry’urumogi ku rwego mpuzamahanga bituma iki gihugu kirukoresha nta nkomyi kivuga ko nta mategeko kirengaho.

Muri Korea ya ruguru urumogi ruragurishwa cyane mu maduka menshi acuruza ibiribwa, ahandi naho ugasanga abantu barimo bararunywa batarinze no kwihisha.

PNG - 700.6 kb
Nyamara nubwo bimeze gutya, mu bihugu byinshi bya Afrika birabujijwe guhinga, kugurisha ndetse no kunywa urumogi

Daniel MUKESHIMANA@Umubavu.com


Travel for Free!


Tanga igitekerezo kuri iyi nkuru



Igitekerezo