Kenya: Umudogiteri w’umugore arasaba Leta ko hasubizwaho umuco wo gusiramura abakobwa

Ni umugore usanzwe ari umuganga wo mu gihugu cya Kenya witwa Tatu Kamau ukomeje gusaba Leta iriho ko umugenzo wo gusiramura abakobwa umaze imyaka mike ucitse wakongera ugasubizwaho.

Muganga Tatu Kamau avuga ko umukobwa umaze kugera mu kigero cy’ubwangavu yarakwiye kwigenga mu byo akora bityo akajya yifatira umwanzuro wo gusaramurwa cyangwa kubireka ariko ntihagire ubibuzwa mu gihe abishaka.

Uyu muganga akomeza avuga ko ngo nubwo umugenzo wo gusiramura abakobwa wari waraciwe mu gihugu, hari imiryango itari mike ikiwukurikiza ariko mu buryo bw’ibanga.

PNG - 917.9 kb
Gusiramura abakobwa biracyakorwa mu bo bita "Abamasayi"


Dogiteri Kamau akavuga ko igikwiriye ari ukuwukora nkuko no mu bindi bihugu bigenda, umukobwa ubyifuza agasiramurwa ariko bikorewe mu bitaro nkuko BBC ikomeza ibivuga.

Uyu mugore yashyikirije ikirego cye urukiko asaba ko uwo mugenzo wasubizwaho by’umwihariko akikoma bamwe mu banyepolitiki basabye ko uyu muco wahagarikwa mu gihugu cyose ku buryo bwa burundu.

Dogiteri Kamau yagize ati "numva binteye ubwoba mu gihe Inteko Inshinga Amategeko ishobora kuntegeka icyo nakora n’icyo ntakora. Igihe Inteko Inshinga Amategeko ishobora gukuraho uyu mugenzo cyangwa igerageza kuwuhagarika burundu ejo aho bukera izakuraho n’amadini. Umukobwa akwiye gushyigikirwa mu ngingo afata, ntakwiye gukora ku ngufu ibyo atiteguriye".

Amategeko ya Kenya ntiyemera iby’uwo mugenzo ndetse n’ufashwe awukora arabihanirwa. Ku bwa Muganga Kamau, ngo kuwuhagarika bisa no gukumira abakobwa mu gihe abahungu bagisiramurwa.

Ikindi ngo abawurwanya ni abatazi akamaro kawo, hano tukaba twabamenyesha ko abawushyigikira bavuga ko ufasha abakobwa kwirinda kwishora mu bahungu by’umwihariko bakora imibonano mpuzabitsina.

Mu gihe uyu mugenzo wahagarikwaga muri gihugu, ubutegetsi bwa Kenya bwasobanuye ko hari abana b’abakobwa bapfaga nyuma yo gusiramurwa, abandi nabo bikababuza amahirwe yo gukomeza amashuri yabo bityo bakajya kurongorwa bitewe nuko mu miryango imwe n’imwe umukobwa yasiramurwaga ashyitse mu kigero cyo gushaka.

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo