Ikibazo cya serivisi z’ubuvuzi zitavurirwaga kuri Mituweri ku bafite ubumuga cyavugutiwe umuti

Mu kwizihiza umunsi mpuzamahanga w’abantu bafite ubumuga kuri iyi nshuro wari ufite insanganyamatsiko igira iti "impinduka nyazo ziganisha ku iterambere rirambye kandi ridaheza, wabereye ku rwego rw’igihugu mu Karere ka Kayonza, mu Murenge wa Gahini mu Kagari k’Urugarama, Umunyamabanga muri Minisiteri y’Ubutegetsi bw’Igihugu ushinzwe imibereho myiza y’abaturage ari nawe wari umushyitsi mukuru, Dr. Alvera MUKABARAMBA yaruhuye imitima y’abantu bafite ubumuga ku kibazo bari bamaranye igihe cyo kudahabwa serivisi zimwe na zimwe z’ubuvuzi bakoresheje ubwisungane mu kwivuza.

Kuri iki cyumweru tariki ya 03 Ukuboza 2017 ubwo hizihizwaga umunsi mpuzamahanga w’abantu bafite ubumuga, abayobozi batandukanye barimo umushyitsi mukuru, Dr. Alvera MUKABARAMBA, Umunyamabanga muri Minisiteri y’Ubutegetsi bw’Igihugu ushinzwe imibereho myiza y’abaturage, Meya w’Akarere ka Kayonza Murenzi Jean Claude, Guverineri w’Intara y’Iburasirazuba MUFULUKYE Fred, Perezida w’Inama y’Abantu bafite ubumuga Romalis NIYOMUGABO bafatanyije n’abaturage barimo n’abafite ubumuga, batangiye basura urusengero rw’ikitegererezo rwa Diyosezi ya Gahini rufite umwihariko wo kuba rwubatse ku buryo bufasha n’abafite ubumuga.

JPEG - 74.4 ko
Dr. Alvera Mukabaramba afatanyije n’abayobozi batandukanye bagezwaho ikibazo cyo kuba insimburangingo n’inyunganiramubiri zihenze

JPEG - 78.5 ko
Izi nsimburangingo zisanzwe zihenze ku buryo atari buri wese wazigondera


Hasuwe kandi n’ibitaro by’ikitegererezo biri kubakwa nabyo bizajya bifasha mu buvuzi bw’abantu bafite ubumuga ari naho bamwe mu baganga bakorera muri ibi bitaro basobanuriye Dr. Alvera Mukabaramba uburyo ibi bitaro bizajya bikora. Aba baganga bagaragarije Minisitiri ikibazo cyo kuba bumwe mu buvuzi bukenerwa n’abafite ubumuga batabasha kubuhabwa bitewe nuko Mituweri ikoreshwa na benshi idashobora kubafasha kubona ubuvuzi bwose bakeneye cyane cyane mu gihe hari ukeneye inyunganiramubiri n’inyunganirangingo.

JPEG - 63 ko
Ikigo cya Gahini kiri kubakwa kizaba gifite umwihariko mu mikorere yacyo


Ni ikibazo cyagarutsweho na Perezida w’Inama y’Igihugu y’abafite ubumuga (National Council of Persons with Disabilities, NCPD), Romalis NIYOMUGABO asaba Minisitiri ko yabakorera ubuvugizi ku kigo cy’ubwiteganyirize cya RSSB ku buryo buri bitaro by’Akarere byaba bifite ubushobozi bwo kuba byabonera ufite ubumuga wese ubigannye ubuvuzi abikeneyeho.

JPEG - 115.5 ko
Ibi ni bimwe mu bikoresho byakozwe n’abafite ubumuga


Romalis NIYOMUGABO kandi yanagarutse ku zindi mbogamizi abafite ubumuga bagihura nazo mu buzima bwabo bwa buri munsi aho kugeza kuri ubu usanga mu burezi bagifite umubare mukeya w’abarimu bashobora gufasha by’umwihariko abafite ubumuga, kuba nta modoka ziragurwa zishobora kwifashishwa kandi nyamara ku masoko mpuzamahanga zitahabuze. Icyakora nubwo hakiri ibi bibazo, uyu muyobozi yashimiye intambwe imaze guterwa by’umwihariko babifashijwemo na Leta y’Ubumwe irongowe na Nyakubahwa Perezida wa Repubulika y’u Rwanda, Paul KAGAME.
Mu ijambo rye, Romalis NIYOMUGABO yasoje ashimira byimazeyo kandi Diyosezi ya Gahini ashingiye ko ari yo yatangije ikigo cy’abafite ubumuga cya Gahini ikanatanga ubutaka bwayo ndetse n’imbarahga zayo. Hanashimiwe abandi bantu b’indashyikirwa bagiye bafasha mu bikorwa bitandukanye abafite ubumuga bashyikirizwa amashimwe atandukanye.

JPEG - 73.7 ko
Musenyeri wa Diyosezi ya Gahini yashimiwe uburyo batangije ikigo cy’abafite ubumuga cya Gahini

PNG - 838 ko
Perezida w’Inama y’Abantu bafite ubumuga Romalis NIYOMUGABO


Mu ijambo ry’umushyitsi mukuru, Nyakubahwa Umunyamabanga muri Minisiteri y’Ubutegetsi bw’Igihugu ushinzwe imibereho myiza y’abaturage, Dr. Alvera Mukabaramba, yasabye inzego zose gushyigikira ibikorwa byose biteza imbere uburenganzira bw’abafite ubumuga nkuko byanagarutsweho mu butumwa bwatanzwe mu mbyino no mu ikinamico ngufi.

JPEG - 250.2 ko
Aba ni bamwe mu bafite ubumuga batangaga uburtumwa bwabo mu ikinamico ngufi
JPEG - 106 ko
Abakecuru bari babukereye nabo batanga ubutumwa bwabo mu mbyino


Ku kibazo nyamukuru cyari gifitwe n’abafite ubumuga cyo kuba ubwisungane ku kwivuza hari serivi zimwe na zimwe z’ubuvuzi batabonaga kubera zihenze by’umwihariko mu gihe hari ukeneye inyunganiramubiri n’inyunganirangingo, Dr. Alvera Mukabaramba yahumurije abafite ubumuga ababwira ko kuri ubu ibiganiro kuri iki kibazo byarangiye bityo bidatinze ibitaro bya Gahini bikaba bigiye gutangira gukorana n’ikigo cy’abafite ubumuga cya Gahini.
Mu gihe iki kigo cya Gahini kizaba gitangiye gukora, bizafasha abafite ubumuga kuzajya bahabwa serivisi zose z’ubuvuzi kandi bakoresheje Mituweri yabo. Dr. Alvera Mukabaramba yongeyeho ko uretse ikigo cya Gahini n’icya Gatagara nacyo ibiganiro byarangiye kuri iki kibazo ku buryo mu mwaka wa 2018 kizarangira burundu.
Dr. Alvera MUKABARAMBA yagize ati " Ku ikubitiro iyi gahunda izatangirira mu bitaro bya Gahini, ibya Ririma, na Gatagara yo mu Majyepfo."
Inama y’Igihugu y’Abantu bafite ubumuga (NCPD) ihuriwemo n’abafite ubumuga basaga 4000, ifite abafatanyabikorwa batandukanye bayifasha muri gahunda zayo za buri munsi biganjemo imiryango mpuzamahanga nka UNICEF, HANDICAP International, VSO, NUDOR, UPHLS, RURA, CBM, MYRIGHT, Diyosezi ya Gahini, OTTOBOCK, World Vision n’abandi batandukanye. Umunsi mpuzamahanga w’ abafite ubumuga mu isi watangiye kwizihizwa mu mwaka wa 1992, mu gihe mu Rwanda umaze imyaka 10 wizihizwa.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo