Ikibazo cy’inkwano ihanitse gishobora gutuma abasore bamwe batarongora

Kimwe n’ahandi henshi ku isi, mu gihugu cya Zimbabwe ikibazo cy’inkwano y’umurengera gishobora kuzatuma bamwe mu bakobwa barushaho kugumirwa. Priccilar Vengesai, umucamanza wo muri Zimbabwe yibaza niba umugenzo wo gukwa ukwiye guhinduka nk’ubucuruzi, we avuga ko imiryango y’umuhungu n’umukobwa yompi yari ikwiye gukwa kugira ngo haboneke uburinganire hagati y’abagabo n’abagore.

Uyu munyamategeko yashyikirije ikifuzo cye urukiko rwo muri Zimbwbwe rushinzwe kurengera Itegeko Nshinga n’andi mategeko aho asaba ko ubusabe bwe bwasuzumwa avuga ko umugenzo wo gukwa ku musore wakwigwaho neza ugahabwa umurongo muzima mu buryo bwo gukomeza gufasha abanyazimbabwe cyane cyane urubyiruko rugorwa n’iki kibazo bigatuma rugorwa no gushinga ingo bishingiye ku kibazo cy’inkwano itavugwaho rumwe mu miryango.

Ibinyamakuru bitandukanye bivuga ko igituma yifuza ihinduka ry’uyu mugenzo ari ukugira ngo bitaguma kubangamira abaturage ba Zimbabwe nk’uko by’umwihariko we byamugendekeye mu gihe yashingaga urugo rwe umugabo we agacibwa inkwano y’umurengera.

Priccilar Vengesai yagize ati "Sinagiye mu byo kwumvikana ku giciro cy’inkwano. Sinigeze mpabwa amahirwe yo kubaza impamvu impano yasabwe ingana uko yanganaga, ibyo byose byakozwe byatumye niyumva nk’umuntu uri gucuruzwa, umuryango wange washyizweho igiciro ntarengwa umugabo wange yagombaga kwishyura. Ibi byatumye ntakaza agaciro imbere y’umugabo ndetse niyumva nk’ igikoresho ku mugabo wange cyane ko nabonaga ko binsa nk’aho yanguze.

Nakomokaga mu muryango w’aba Shona, nkaba narifuzaga guhita nubaka urugo rwiza ariko iki kibazo kikangora kandi mu migenzo y’aba Shona, inkwano igomba gutangwa mbere y’uko ubukwe bwemerwa n’umuryango. Mu gihe inkwano idatanzwe mbere, ababyeyi bafatanyije n’umuryango ntibemerera umuryango w’umusore gusezerana imbere y’amategeko.”

Ibi byose byaje nyuma y’aho urubyiruko rwo muri Zimbabwe rugaragaje ikibazo cy’inkwano ihanitse idatuma rushinga ingo zarwo narwo rusaba ko iyi ngingo yagenzurwa neza igahabwa umurongo kugira ngo idakomeza guteza ibibazo mu muryango mugari w’abaturage byanaba ngombwa igakurwaho dore ko ngo ntacyo iri gufasha imiryango kitari ugusenya mu gihe hatabayeho ubwumvikane mu miryango.

Iki kibazo cy’inkwano ihanitse ndetse y’umurengera gikunze kuvugwa mu bihugu byinshi aho usanga bigoranye ku rubyiruko gushing ingo. Igikomeye ngo ahenshi usanga ababyeyi bashaka kugira abakobwa babo ibicuruzwa bifuza kubakuraho amafaranga bigatuma bamwe usanga bagumirwa bitewe n’iki kibazo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo