Ibi bintu 5 umusore wese aba yifuza ko umukobwa bazarushingana yaba abyujuje

Hari abantu benshi usanga bibeshya ko abagabo bakunda gusa ubwiza bwo ku ruhu bw’umukobwa cyangwa umugore aba afite nyamara ibi bibaho gusa iyo umugabo adateganya kurushingana n’uyu mukobwa naho iyo ashaka kurushinga hari ibindi bintu biza mbere y’ubwiza bwo ku ruhu bishobora kwitabwaho mu guhitamo umwari washing urugo.

Umusore cyangwa umugabo wifuza kurushinga hari ibintu areba ku mukobwa yabengutswe kandi aha agaciro gakomeye kurusha ubwiza bw’inyuma ku ruhu. Aha akaba ari nayo mpamvu ushobora kuzasanga hari umukobwa abantu bose batangarira kubera uburanga afite ariko ugasanga atabona umugabo ku buryo bwihuse.
Dore rero ibintu 5 umugabo wese aba yifuza ko uzaba umugore we yagombye kuba yujuje :
1. Imyitwarire myiza
Hari abakobwa usanga ari beza cyane bafite uburanga bushitura uwo ari we wese ubabonye ariko ugasanga imyitwarire yabo ntihwitse. Buri mugabo wese rero yifuza ko uzaba umugore we yagombye kuba afite imyitwarire myiza kandi akabana neza n’abandi.
2. Kwiyubaha
Burya biragoye ko umuntu utiyubaha cyangwa ngo yiyubahishe ashobora kubaha abandi.
Kwambara imyenda ibambika ubusa cyangwa ibagaragaza neza uko bateye, ni byo bigezweho ku bakobwa b’iki gihe. N’ubwo nabyo ari ikibazo gikomeye, hari ibindi birengeje ibi kuba bibi ari byo imbuga nkoranyambaga. Abakobwa benshi ntibazi ko kuri ubu imbuga nkoranyambaga ari indorerwamo bareberwamo n’abagabo maze bikabafasha kuba bafata umwanzuro wo kubasaba kubana na bo cyangwa kubyihorera.
Abagabo ntibakunda umugore uba uri ahantu hose, akorana ibibonetse byose n’umuntu uwo ari we wese bahuye. Mukobwa rero ugomba kumenya ibyo ushyira kuri izi mbuga nkoranyambaga kuko bishobora kukugiraho ingaruka zikomeye mu buzima.
3. Kugira urukundo
Aha ndavuga kugira urukundo ariko ukamenya no kurwerekana. Buri mugabo wese akunda umugore umusoma kenshi akamureba mu maso akamubaza uko yiriwe, akamuhobera akamubaza amakuru n’ibindi n’ibindi. Umugore ubasha gukora ibi abasha no gufungura imiryango y’umutima w’umukunzi we bityo bakabasha kuganira kuri buri kintu. Ikindi bituma umugabo yumva atuje kandi amerewe neza kuko aba abona yitaweho.
4. Kumenya ubwenge
Umugore uzi ubwenge amenya ibimukikije ndetse akamenya neza umukunzi we. Amenya kandi uburyo aganirizamo umukunzi we ari nabyo binatuma babasha kuvuga ku iterambere ryabo. Ntago ubuzima bugarukira ku myenda myiza wabonye, amasakoshi cyangwa filimi nziza ushaka kuzareba cyangwa warebye nk’uko abagore benshi bakunze kubitekereza.
Umugore uzi ubwenge ni uwungura inama umugabo we cyangwa umukunzi we kandi akamufasha kubonera ibisubizo ibibazo bihari aho kuba ari we uhora utura umugabo cyangwa umukunzi we ibibazo.
5. Kwigirira ikizere
Bitewe nuko ubuzima bwuzuyemo ibibazo n’intambara zidashira bityo kugira umugore wifitiye ikizere ni ingenzi cyane kuko bituma umugabo agera ku ndoto ze. Umugore agomba kumenya icyo ashaka kandi ntategereze buri gihe ko umugabo ari we ukimuha.

Alice UMWALI/Umubavu.com



Tanga igitekerezo kuri iyi nkuru



Igitekerezo