Ese umukobwa afashe iya mbere akerurira umusore ko yamwimariyemo byagenda gute ?

Abantu batari bake bakunze kuvuga ko iyo umukobwa afashe iya mbere akibwirira umusore ko yamukunze ngo bitamuhira kuko ngo umusore amusuzugura ndetse bikaba byanaba intandaro yo kumukatira avuga ko nta muco agira ndetse bamwe ugasanga babyita ibara bagendeye ku muco wahozeho kuva kera kugeza magingo aya.

Ese koko ibi ni byo ? Byaba se biterwa n’iki ? Ni iki se ubushakashatsi bubivugaho ? Ni ryari se umukobwa yagakwiye kubwira umusore ko amukunda ? Ubundi se yagakwiye kubimubwira mu buhe buryo ?

Nyuma yo kwibaza ibi bibazo byose, hari ukuri kw’ibintu kandi gufite ishingiro. Burya mu miterere y’abasore n’abagabo habamo kwirarira no kwihagararaho ndetse hakiyongeraho kwiyumvaho ubushobozi n’icyizere gihanitse mu byo bakora.

Ikindi kandi by’umwihariko mu bijyanye n’urukundo, abagabo cyangwa abasore burya nibo bashimishwa bwa mbere no kubona ko bakunzwe kandi bashimwa imbere y’inkumi, bishatse kuvuga ko iyo umusore abonye umukobwa umwereka ko amuba hafi kandi amwitaho, nta kabuza umusore atangira kwiyumvamo akanyamuneza ndetse akumva afite agaciro mu maso ya wa mukobwa.

Tugarutse ku ngingo yacu rero, nta wahamya ijana ku rindi ko umusore wese wibwiriwe n’umukobwa ko amukunda bituma amusuzugura. Ahubwo bitewe n’imiterere y’abasore, mu gihe umukobwa yamukunze burya ikimukora ku mutima ni ukumwereka ko amukunda kandi amuba hafi, akamuha ikaze mbese umusore nawe akabona aho ahera amwibwirira ko amukunda.

Mu gihe ariko umusore n’umukobwa bamaze igihe bakundana bucece mbese hamwe baba batarakora declaration y’urukundo rwabo ariko buri umwe ahora hafi y’undi, nta mpamvu rwose umukobwa atakwibwirira umusore ko amukunda kandi umusore nawe byamushimisha kuko burya mu by’ukuri, umukobwa utinyuka kwibwirira umusore ko amukunda akenshi aba amukunda koko kandi cyane.

Gusa kwa gusuzugurwa kujya kubaho nk’iyo umusore ahuye n’umukobwa, umukobwa agahita abwira umusore ko yamukunze ! Bishobora guhita byereka wa musore ko uwo mukobwa ashobora kuba ajarajara cyangwa se ahuzagurika.

Mu magambo make rero, umukobwa ashobora kwibwirira umusore ko amukunda ariko bisaba kumenya igihe nyacyo, uburyo bwo kubimubwira ndetse n’inzira zo kubinyuzamo.

Wowe se hari ukundi ubyumva ? Hari ukundi se ubizi ? Waba ufite ubuhamya watugezaho tukabusangiza abandi ? Niba ufite igitekerezo cyandike ahabugenewe n’abandi bakimenye.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo