Ali Abdullah Saleh wigeze kuba Perezida wa Yemen yishwe

Ali Abdullah Saleh, wigeze kuyobora igihugu cya Yemeni, yishwe nyuma y’iminsi mike yiyemeje kuganira n’ingabo z’amahanga zirangajwe imbere na Arabia Saudite yari amaze igihe arwanya.

Inyeshyamba z’aba Houthi nizo zamwishe mu gitero cyagabwe mu muhanda igihe yarimo ahunga umurwa mukuru Sanaa.

Hari amafoto na video birimo kuzenguruka kuri interineti byerekana umurambo bivugwa ko ari uwe uriho igikomere gikaze ku mutwe.

Izi nyeshyamba zimaze iminsi zimurwanya kandi bari bafatanije kurwanya izo ngabo z’amahanga ziyobowe na Arabia Saudite.

PNG - 736.3 ko
Saleh ntiyari acyumvikana n’inyeshyamba z’aba Houthi


Inyeshyamba z’aba Houthi zavuze ko urupfu rwe ari intsinzi kuri zo kubera ko yari umugambanyi.

PNG - 729.2 ko
Ali Abdullah Saleh wishwe n’inyeshyamba z’aba Houthi


Abdrabbuh Mansour Hadi, uyoboye igihugu cya Yemeni muri iki gihe uri muri Arabia Saudite yasabye abanyayemeni guhagurikira icyarimwe bakarwanya inyeshyamba z’aba Houthi.

Umuryango w’abibumbye uravuga ko ingendo z’indege zijyanye imfashanyo muri Yemeni zabaye zihagaritswe. Imirwano imaze iminsi ivugwa mu mujyi wa Sanaa yahitanye abantu barenga 120.

Mu mwaka wa 2014 Saleh yifatanyije n’inyeshyamba z’aba-Houthi, bigarurira umujyi wa Sanaa bituma mu 2015 Perezida Hadi ahunga igihugu, ari na byo byabaye intandaro y’uko Arabia Saoudite yinjira muri iyi ntambara. Kuva icyo gihe abagera ku 8670 barishwe abandi 49,960 barakomereka na ho abagera kuri miliyoni 20.7 barahunga abandi baba mu buzima bubi bw’inzara na Cholera imaze guhitana abagera ku 2211 kuva muri Mata.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo