Abazajya bahamwa no gufata ku ngufu no gusambanya abana ngo bakwiye kujya bamanikwa ku biro by’imirenge

Abahamwe n’ibyaha birimo gufata ku ngufu no gusambanya ku gahato abana n’abagore ngo bakwiye kujya bashyirwa ku karubanda bakamenyekana byaba ngombwa urutonde rwabo rukamanikwa ku biro by’imidugudu n’imirenge bakomokamo abantu bakabagendera kure n’abafite imigambi nk’iyabo bakumva ko iki cyaha ari kibi cyane nkuko Perezida w’Urukiko Rukuru, Kalibwabo Charles abivuga.

Kalibwabo Charles, Perezida w’Urukiko Rukuru avuga ko umubare munini w’abana bakomeje guterwa inda zitateguwe ugaragaza ubukana bw’ikibazo cy’abagabo basambanya abana ku gahato nkuko Umuseke babyanditse.

Kalibwabo avuga ko abantu bahamijwe bene ibi byaha by’umwihariko gufata ku ngufu no gusambanya ku gahato bakaza no kubihanirwa badakwiye kongera kugirirwa ikizere.

Charles ati “Agafungurwa akajya mu buzima busanzwe [ntabwo ari bibi], ejo tukamusabira umugeni, akaba umuntu mu bandi, ibi bintu turibwira ko bitari mu nzira yaca intege abandi gukora ibyo byaha.”

Avuga ko abantu nk’aba bakwiye gushyirwa ku karubanda, akandikwa mu bitangazamakuru n’ahandi hose yamenyekana. Ati "Mu yandi magambo akaba ikivume mu muryango."

Uyu muyobozi w’Urukiko Rukuru avuga ko uko hasigaye hatangazwa amazina y’abahamwe n’icyaha cya ruswa ari na ko hakwiye kujya hashyirwa hanze abantu bahamijwe icyaha cyo guhohotera abana.

Ati “Twumva bitanagarukira gutangazwa mu kinyamakuru ahubwo ahubwo amazi y’uwo muntu yari akwiye gutangazwa ku mudugudu w’iwabo bakamenya ngo hari abantu bahamwe n’icyaha k’ihohotera rishingiye ku gitsina,…

Umuntu wese ugiye ku mudugu gushaka icyangombwa akabona izina rya runaka, najya no kurambagiza umukobwa wawe ukavuga uti ariko uyu muntu nubwo yaje kukurambagiza nabonye izina rye ku mudugudu. “

Ngo ibi bikwiye kuganirwaho mu Nteko n’ibiganiro by’abaturage kugira ngo abantu barusheho kugendera kure ibi byaha.

Ati “N’ubitekereza na we azage avuga ati ibi bintu ngiye gukora uretse no gufungwa ariko no muri uyu mudugudu nzaba iciro ry’imigani. “

Avuga ko nubwo hari abashobora kubibona nko guhonyora uburenganzira bwa muntu ariko ko abahohoteye abandi atari bo bakwiye uburenganzira kuruta abahohotewe.

Mu bihugu byateye imbere, ngo iyo uhamwe n’ibyaha byo gusambanya ku gahato bishyirwa mu byangombwa byabo kugira ngo aho ajya hose bamenye icyo cyasha n’amateka yawe.

Kalibwabo avuga ko mu Rwanda na ho bikwiye gukorwa kugira ngo aho uwahamijwe iki cyaha yajya hose amenyekane yimwe amahirwe runaka ndetse n’abandi babyigireho.

Uyu muyobozi mukuru mu bucamanza bw’u Rwanda atanga inama z’uko abantu bahamijwe ibi byaha batangazwa, akavuga ko binashobotse hajyaho urubuga rwa murandasi rugashyirwaho urutonde rw’aba bantu.

Mu mwaka wa 2015-2016 abahamijwe icyaha k’ihohoterwa rishingiye ku gitsina bari 1 920 barimo abagabo 1 868 n’abagore 90, mu mwaka wa 2016/2017 babaye 1 951 barimo abagabo 1 889 n’abagore 62.

Mu mwaka ushize kandi abana barenga ibihumbi 15 batewe inda batarageza ku myaka y’ubukure.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
khalid Kuya 30-11-2017

Muge mubanza mutekereze ishuro zi rindwi kugihano mwifuza gushirisha mumategeko utazashiduka cyahawe Umwana wawe cg uwomuryango ukazabyicuza

ndagije Kuya 30-11-2017

ndabishyigikiye ariko nanone ubutabera bujye buhamya umuntu icyo cyaha barebye neza ko kimuhama,bitabaye ibyo kuba ruvumwa mubantu Wenda arakagambane kabaye,wabyita gupfa kabiri,igitekerezo cyange mugitamutse ndabasabye.