Abantu 348 bahitanywe n’umutingito ukaze muri Irani na Iraki

Umutingito ukaze wo ku gipimo cya 7.3 wibasiye igihugu cya Iraki ku mupaka wo mu burengerazuba bw’igihugu cya Irani na Iraki hapfa abantu 348 hanakomereka ababarirwa mu bihumbi.

Umunya Irani ukora mu kigo cy’ubutabazi yavuze ko abantu 70,000 bakeneye aho bakinga umusaya, nyuma y’uyu mutingito wibasiye ku buryo budasanzwe igice kinini cy’igihugu cya Iraki.

Mu bapfuye benshi muri bo ni abaturuka mu ntara ya Kermanshah iri mu burengerazuba bwa Irani, hafi 5660 ngo bakaba bakomeretse bikomeye.

Abantu bagera kuri barindwi nibo bapfiriye muri Iraki, aho abanyagihugu bari kwiruka mu mihanda mu murwa mukuru Baghdad.

Umubyeyi w’abana batatu, Majida Ameer yavuganye n’ibiro ntaramakuru Reuters agira ati "Nari nicaye n’abana turi gufungura nyuma tuza kumva inzu irimo inyeganyega. "Ubwa mbere nagize ngo ni bombe nini itewe, nyuma numva abantu bose barimo barakomera bavuza induru bavuga ngo umutingito !"

Mu misozi igwiriyemwo abo mu bwoko bw’aba Curdes, inzu nyinshi zubatswe n’amatafari y’ibyondo, zasenyutse nyuma y’uyu mutingito wabaye ku munsi w’ejo.

Imiryango y’abatabazi ntiyashoboye gukora ibikorwa by’ubutabazi neza bitewe nuko bitari byoroshye nkuko Pir Hossein Koolivand, wo mu kigo cy’ubutabazi yabivuze.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo