Abakecuru 10 baciye uduhigo two kwibaruka bashaje kurusha abandi

Uko bukeye nuko bwije niko isi ikomeza kugenda igaragaramo ibintu bitangaje ndetse bikayobera abantu cyane ko hari ibyo umuntu aba atabasha gusobanura no gusobanukirwa uburyo bibaye. Kuri iyi ngingo dushobora kuvuga ku dushya twinshi tugenda tugaragara ku isi ariko reka twivugire ku bakecuru 10 baciye uduhigo two kubyara bashaje kuruta abandi.

Tutitaye ko nta muhanga wo kuba ku isi akaramata cyane ko byananiranye kuko umuntu wese igihe cye iyo kigeze atambuka agasiga inshuti, abavandimwe n’umuryango, ku isi hakomeje kugenda hagaragara abantu babaho imyaka myinshi kurusha abandi, abafite uburebure burushije ubw’abandi yewe tutibagiwe n’aba babyaye bashaje kurusha abandi.

Umubavu.com twaguteguriye urutonde rw’abakecuru 10 babyaye bashaje kurusha abandi ku Isi :

10. Haya Shahar :

Uyu mugore yabyaye afite imyaka 65 y’amavuko hari nyuma y’igihe kitari gito we n’umugabo we Shmuel bashaka umwana baramubuze. Haya ageze ku myaka 46 we’n’umugabo we bataye ikizere ko kuba bashobora kubyara ariko ku myaka 65 babyara umwana w’umuhungu kandi umeze neza.

9. Memnune Tiryaki

Uyu mugore wo muri Turukiya mu mwaka wa 2006 ku myaka 64 nibwo yibarutse aba aciye agahigo ko kuba umugore wa mbere muri Turukiya ubyaye afite imyaka myishi kuko yabyaye afite imyaka 64 icyo gihe umugabo we Omer Tiryaki yari afite imyaka 62. Aba nabo bari barabuze urubyaro biba ngombwa ko bifashisha ikoranabuhanga ngo babashe kubyara.

8. Harriet Stole : Uyu ni umugore wo mu Bwongereza wibarutse afite imyaka 66 y’amavuko icyo gihe hari mu mwaka wa 1999.Uyu mugore nawe akaba yarabyaye hifashishijwe uburyo bw’ikoranabuhanga bwo kumuha intanga ngore maze agatwita ndetse akabyara.

7. Annegret Raunigk

uyu mugore mu mwaka wa 2015 yaciye agahigo ubwo ku myaka 65 yibarukaga abana bane abahungu batatu n’umukobwa umwe. Bitewe n’uko uyu mugore yari yaragejeje igihe cyo gucura byabaye ngombwa ko ahabwa intanga ngore ihuzwa n’intanga ngabo maze abona kubyara.

6. Elizabeth Lizzie Adeney

Uyu mugore wo mu Bwongereza yabyaye afite imyaka 66 nyuma yo kubura urubyaro nawe yahawe intanga maze abyara umwana w’umuhungu, uyu mwana akaba yaramubyaye babanje kumubaga.

5. Maria del Carmen Bousada de Lara

Uyu mugore yibarutse impanga hari mu mwaka wa 2006 gusa akaba atagize amahirwe yo kurera abo yari yibarutse ngo bakure n’ubwo yari yababyaye abashaka kuko mu mwaka wa 2009 yaje kwitaba Imana ahitanywe na Kanseri. Aba bana be barerwa n’undi muryango.

4. Adriana Iliescu

Hari mu mwaka wa 2005 ubwo uyu Adriam wari umwarimu muri Kaminuza yahitagamo kubyara umwana nyuma y’igihe kirekire yarabuze urubyaro yewe n’abaganga ntako batagize ariko bikananira. Gusa uyu mubyeyi yaje gusama inda y’abana batatu, ku bw’amahirwe make babiri bapfira mu nda havuka umwana umwe w’umukobwa.

3. Omkari Panwar

uyu mugore yahisemo kubyara ku myaka ye 70 nyuma yo kubona ko yabyaye abakobwa gusa kandi ageze mu zabukuru akeneye umuhungu wo kuzungura imitungo ya se. Ni bwo uyu mugore yitereshagamo intanga maze aza kubyara abana babiri umuhungu n’umukobwa. Aba bana akaba yarababyaye mu mwaka wa 2008.

2. Daljinder Kaur

Ku myaka 72 y’amavuko Daljinder umugore wo mu Buhinde yabyaye umwana nyuma y’igihe kitari gito we n’umugabo we barabuze urubyaro ariko bifashishije ikoranabuhanga babashe guhabwa intanga maze uyu mukecuru aratwita hanyuma arabyara.

1. Rajo Devi Lohan

Hari mu mwaka wa 2008 ubwo Rajo yibarukaga,yari amaze igihe kitari gito yarabuze urubyaro ariko nk’uko iyo bigeze ku myaka hagati ya 45-50 umugore aba atagishobye kubyara uyu mukecuru yasabye intanga maze aratwita abyara umwana w’umukobwa.

Kuri iyi Isi dutuye hakomeje kugenda hagaragaraza abantu badasanzwe. Ndetse n’abandi bakora ibikorwa bitangaje. Ibi bigatizwa umurindi n’ikoranabuhanga rimaze gutera imbera mu bihugu byinshi kandi ari nako iri koranabuhanga rihindura ubuzima bwa muntu mu buryo butangaje.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
koko Kuya 17-12-2017

Ni byiza kwandika inkuru nkizi gusa mujye mureba no muri BIBILIYA kuko sarah wa Abraham yabyaye Isaac akuze kubaruta bose kuko yarenzaga imyaka 90.
Kandi nta mbaraga za science zikoreshejwe mugihe hafi ya briya bose habayeho science and technology intervention.
Muhimbaze kandi mushimire YEHOVA ku bw’imirimo ikomeye akora.
Thanks