Nyirahabineza Jane yahagurukiye akajagari kaba mu bavuzi Gakondo

Ubuyobozi bw’Ihuriro ry’Abavuzi Gakondo mu Rwanda, AGA Rwanda Network bukomeje igikorwa cyo kubarura abanyamuryango nyirizina bakora uyu mwuga mu rwego rwo kuzabafasha kuwunoza neza no guca akajagari kawurangwamo cyane cyane bishingiye ku bawiyitirira.

Ni igikorwa cyakomereje ku Karere ka Kicukiro kuri uyu wa gatatu tariki ya 15 Gicurasi 2019, kikaba cyaratangiriye ku mugaragaro mu karere ka Nyarugenge.

Perezidante w’Ihuriro ry’Abavuzi Gakondo mu Rwanda, AGA Rwanda Network, Nyirahabineza Jane ashimangira ko iri barura rigamije guca akajagari muri uyu mwuga.

Ati “Twatangiriye iri barura mu Karere ka Nyarugenge ku wa 13 Gicurasi 2019, uyu munsi twaje hano muri Kicukiro mu rwego rwo kubarura Abavuzi Gakondo nyirizina kuko nta murongo nyirizina twari dufite tugenderaho, niyo mpamvu twahisemo kubarura mu rwego rwo guca akajagari duhereye kuri buri karere kugeza ku rwego rw’igihugu”.

Abajijwe niba baramaze kumenya umubare nyirizina w’Abavuzi Gakondo babaruye muri Nyarugenge, yavuze ko bose bataritabira iri barura ngo kuko hari abo usanga bashukwa babuzwa kwibaruza n’abapfobya uyu mwuga w’ubuvuzi Gakondo.

Ati “Umubare w’Abavuzi Gakondo twabaruye, ntabwo bose baritabira kuko harimo abakibahuzaguritsa bababwira bati ‘nyamara ntabwo ari byiza ko mwabarurwa, mwaba mubiretse, muzakorera aho’, barahari turabafite bagenda bapfobya uyu mwuga dore ko n’abaturage bashukwa byoroshye, gusa twabonye abantu 46 kandi uko tumaze kubarura tubasigira Akarere mu rwego rwo kugira ngo bajye bamenya Abavuzi Gakondo bafite mu karere mu bufatanye bwabo natwe”.

Umuyobozi w’Abavuzi Gakondo avuga ko ibi bizafasha kandi kumenya uwateje akajagari n’aho aherereye kuko bose bazaba bari ku rutonde rwemewe n’umuyobozi wabo azwi.

Abavuzi Gakondo bo mu karere ka Kicukiro basabwe gukoresha ibimera, ibikomoka ku nyamaswa, ibikomoka ku butaka ndetse n’amazi, gukunda umwuga batibagiwe no gutera imiti yabo kugira ngo itazabacika cyane cyane ku bafite imirima mu byaro.

Uyu muyobozi akomeza ashishikariza uwitwa umuvuzi Gakondo wese kwibaruza kuko aribwo azakora ibintu bizwi kandi afitiye uburenganzira ndetse azwi mu nzego z’ibanze ko akora uyu mwuga.

Ku bakiyicariye mu rugo bataraza kwibaruza, Nyirahabineza Jane abagira inama kwitabira iri barura hakiri kare kuko nyuma uwazajya aza kwibaruza ku kicaro gikuru ashobora kuzajya acibwa amande y’ubukererwe.

Ku bagenda bangisha abandi iki gikorwa avuga ko mu gihe hagira umenyekana ko ashuka abandi abangisha ubuyobozi cyangwa ababuza kwibaruza yashyikirizwa inzego z’umutekano akabiryuzwa.

Iki gikorwa cyo kubarura abavuzi Gakondo mu gihugu biteganyijwe ko kizakomereza mu karere ka Gasabo ku wa 18-19 Gicurasi 2019, nyuma bazerekeze mu Burasirazuba I Bugesera no mu zindi ntara. Iki gikorwa kizasozwa ku wa 11 Nyakanga 2019.

Umuvuzi Gakondo wibaruza yitwaza ikarita ye y’ubuvuzi Gakondo yari afite, Kopi y’indangamuntu, ku munyarwanda mu gihe umunyamahanga we asabwa Pasiporo na VISA kugira ngo bimenyekane niba koko akorera mu gihugu mu buryo bwemewe, hakaniyongeraho icyangombwa giturutse aho akomoka gifasha kumenya niba ubuvuzi akorera mu Rwanda n’iwabo yarabukoraga.

JPEG - 247 kb
Abavuzi Gakondo bakomeje kwibaruza
JPEG - 244.8 kb
Aba ni Abavuzi Gakondo baje kwibaruza

JPEG - 209.9 kb
Ibarura ry’Abavuzi Gakondo ryatangirijwe mu karere ka Nyarugenge ku wa 13 Gicurasi 2019
JPEG - 156.1 kb
Nyirahabineza Jane, Perezidante w’Ihuriro ry’Abavuzi Gakondo arashishikariza abataribaruza kwihutira kubikora kugira ngo batazacibwa amande y’ubukererwe dore ko uturere twose twagenewe igihe gihagije

@Umubavu.com





Tanga igitekerezo kuri iyi nkuru



Igitekerezo