Ntabwo dukwiye kuba dufite abaturage batamenya niba buri bucye- Perezida Kagame

Perezida Kagame avuga ko nubwo u Rwanda rufite amateka akomeye rwanyuzemo, bidakwiye ko abaturage barwo babaho mu buzima bwo kubara ubucyeye, babona bwije bakibaza niba buri bucye.

Yabitangaje ejo kuwa Kane ubwo yasozaga umwiherero wa 14 w’abayobozi b’igihugu wari umaze icyumweru ubera mu kigo cya gisirikare i Gabiro mu Karere ka Gatsibo.

Umukuru w’Igihugu yibukije abayobozi ko nta rwitwazo ruhari rwatuma Abanyarwanda babaho nabi ku rwego rwo kumva ko kugeza imyaka 40 ari igitangaza.

Yagize ati “Ntabwo dukwiye kuba dufite abana barwaye bwaki, ntabwo dukwiye kuba dufite abaturage badafite icyo kurya gihagije, ntabwo dukwiye kuba dufite abaturage abayobozi baberaho kubongeraho ibibazo kubyo bari bafite ahubwo barabikemura, ntabwo dukwiye kuba dufite abaturage batamenya niba buri bucye, ntabwo dukwiye kuba dufite abaturage bavuga ngo ningira Imana nzageza ku myaka 40.”

Yasabye abayobozi kuzuza inshingano bagombwa n’abaturage, bagakora ibikorwa bibateza imbere, bityo Umunyarwanda akagera ku rwego rwo kumva ko ashobora kubaho akageza imyaka 70 kandi akizera ko n’umwana we azayigezaho.

Imibare yerekana ko icyizere cyo kubaho ku Munyarwanda ari imyaka 64.5, mu gihe hifuzwa ko mu 2020 nibura kizaba kigeze kuri 66 kivuye kuri 49 cyariho mu 2000.

Yaburiye abayobozi babeshya

Perezida Kagame yakomoje ku bayobozi badakora akazi bashinzwe ahubwo bagashaka kubeshya ko bakora, avuga ko bitazabahira kuko ibikorwa ubwabyo bizabatamaza.

Yagize ati “Ntuzabeshya ko warwanyije ubukene utaraburwanyije ngo biguhire, kuko uzabyuka ubusanga ku muryango [...], niba wibwira ko uri mu nzira z’ubusamo cyangwa ubeshya uti ndarusimbuka, urarusimbuka rimwe ubwa kabiri urafatwa.”

Yakomeje agira ati “Ibyo ukora nabi tukaba turi aha mu nama ukaba wabeshye ngo ibintu byose turabikora [...], ntabwo ndi bujye impaka nawe ndakwihorera, ejo mu gitondo ukuri kuragushyira hanze, niba umutekano twagombaga kubaka tutarawubatse uko byagombaga biradushyira hanze, ntushobora kubihisha, niba ari amashanyarazi wagombaga guha abaturage, inganda niba utarakoze ibyangombwa ngo amashanyarazi aboneka ukaza ahangaha gusa ukabeshya abantu ko ibintu byose biri mu nzira, twarabitunganyije, uwo munsi urawurenze ku kinyoma ariko ukurikira urafatwa.”

Perezida Kagame avuga ko hari byinshi byagaragarijwe mu mwiherero ko bishoboka kandi n’igihugu kibifitiye amikoro, bityo hari byinshi igihugu cyageraho cyifashishije bike gifite, gusangira intego, ubwitange kandi ntibiharirwe abantu bamwe.

Yagize ati “Mu myaka 23 ishize iki gihugu cyari ku busa, aho tugeze ubu ntabwo ari uko twabonye amikoro ahagije aduha ibingibi dufite, ahubwo ni uko twatubuye amikoro make ahari tukayabyaza byinshi birenze ibisanzwe ayo mikoro akwiriye kuba aha abantu.”

Umwiherero w’uyu mwaka wabaye umwanya wo kwisuzuma ku ntego igihugu cyihaye mu cyerekezo 2020, gahunda ya Guverinoma y’imyaka irindwi no muri EDPRS II.
sOURCE IGIHE



Tanga igitekerezo kuri iyi nkuru



Igitekerezo