Umuhanda wa Gari ya Moshi Isaka-Kigali urasaba u Rwanda amamiliyari

Mu mpera z’icyumweru gishize nibwo Perezida wa Repubulika y’u Rwanda, Paul Kagame yari mu ruzinduko mu gihugu cya Tanzania aho we na mugenzi we, Dr. John Pombe Magufuli bemeranyije gutangira kubaka umuhanda wa Gari ya Moshi Isaka-Kigali. Biteganyijwe ko uyu mwaka ugomba gushira hatangijwe ibikorwa by’iyubakwa ry’uyu muhanda uzatwara u Rwanda asaga Miliyari 2.5 z’amadolari.

Learn how to Thrive

Uretse ubushake bw’abakuru b’ibihugu, ubuyobozi bw’Ikigo cy’Igihugu Gishinzwe Iterambere ry’Ubwikorezi mu Rwanda (RTDA), butangaza ko inyigo y’uyu mushinga yarangiye kandi kuyishyira mu bikorwa bizihutishwa.

Umuyobozi muri RTDA ukuriye Ishami ry’Ubushakashatsi n’Igenamigambi, Barisanga Fabrice, yabwiye Radio Rwanda ko inyigo yakozwe mu 2014, icyo gihe igamije kwiga umuhanda wose kuva Dar es Salaam ukagera i Kigali, ureshya n’ibilometero hafi 1464.

Gusa ubu ikiri kurebwaho ubu ni igice cy’uwo umuhanda kizava Isaka-Kigali, harimo kilometero 494, aho u Rwanda rufiteho 150 rugomba kwiyubakira.

PNG - 747.9 kb
Perezida Paul Kagame na Dr. John Pombe Magufuli bemeranyije gutangira kubaka umuhanda wa Gari ya Moshi Isaka-Kigali.


Yakomeje agira ati “Inyigo itwereka ko umushinga wose uzatwara hafi miliyari 2.5 z’amadolari (asaga miliyari 2140 Frw). Ni umushinga munini ndetse usaba amikoro ahambaye, ariko ku bw’imbaraga z’abayobozi bacu, ngira ngo ni narwo ruzinduko Perezida wa Repubulika yakoreye muri Tanzania, bakemeranya ko umushinga wakwihuta, natwe ku gice cy’abashinzwe ibya tekiniki turiteguye, kandi umurongo twahawe n’abakuru b’ibihugu twiteguye kuwesa.”

“Uyu mushinga uca mu Karere ka Kirehe, ugaca mu Karere ka Ngoma, ugaca mu Karere ka Bugesera, ukazarangirira Kicukiro hano hafi y’Inyange. Ikijyanye n’abaturage bashobora kugerwaho n’ingaruka z’uyu mushinga, inyigo itwereka ko ari abagera ku 2450. Ni abazagerwaho n’ingaruka zo kwimurwa cyangwa se hari ubutaka bwabo bugafatwaho.”

Umunyamabanga wa Leta muri Minisiteri y’Ibikorwa remezo ushinzwe ubwikorezi, Jean de Dieu Uwihanganye, yabwiye IGIHE ko ibihugu byombi bigomba kumvikana uburyo bwo kubona amafaranga azakoreshwa mu iyubakwa ry’uyu muhanda.
Ati “ Tuzumvikana uko bizagenda mu byumweru bibiri nkuko babidusabye”.

Uyu mushinga kandi utegerejweho gutanga akazi haba mu kubaka cyangwa mu bikorwa byawo ubwo umuhanda wa gari ya moshi uzaba umaze kuzura n’ibindi.

Tanzania yo yatangiye kubaka uwo muhanda mu byiciro bibiri, Dar es Salaam-Morogoro (ibilometero 330) na Morogoro- Makutupora (ibilometero 426).

Byitezwe ko uzahuza icyambu cya Dar es Salaam na Kigali unyuze Isaka, witezwe kandi kuzoroshya ingendo z’abantu n’ibiciriza biva cyangwa biza mu Rwanda, cyane ko hafi 70% by’ibicuruzwa u Rwanda rutumiza cyangwa ruvana mu mahanga, binyuzwa muri Tanzania.

Ni umuvuno wa kabiri uciwe

Mbere byavugwaga ko umuhanda wa mbere wa gari ya moshi uzagera mu Rwanda uvuye ku cyambu cya Mombasa muri Kenya, ariko Uganda yabaye nk’itihutisha kubaka umuhanda wagomba gutuma byoroha ko ugera mu Rwanda, mu gihe Kenya yo ikomeje kubaka uruhande rwayo.

Umuhanda wagombaga guca mu muhora wa ruguru ugahuza Mombasa-Nairobi-Kisumu-Malaba (Kenya) ugakomeza Kampala (Uganda), ukabona kugera mu Rwanda, ariko buri gihugu kikagenda cyubaka ku butaka bwacyo, cyageza ku mupaka ikindi kigacumbukura.

Gusa amakuru avuga ko Uganda yo ubu ishyize imbere kubanza kubaka umuhanda wa gari ya moshi uyihuza na Sudani y’ Epfo kubera ko ari ho yohereza ibicuruzwa byinshi.

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo