Nyabihu : Abahinzi b’ibirayi mu gihirahiro nyuma yo kumara ibyumweru bibiri bahagaritswe gusarura

Kuba mu gihe cy’ihinga imbuto n’izindi nyongeramusaruro biba bihenze ariko mu isarura ibiciro bikagwa ni kimwe mu byo abahinzi b’ibirayi bagarukaho nk’imbogamizi zibabuza gutera imbere uko bikwiye, abo mu karere ka Nyabihu babwiye TV/Radio1 ko n’uburyo bwo kubonera isoko umusaruro wabo butanoze aho nk’ubu ngo bamaze hafi ibyumweru bitatu babujijwe gusarura n’abasaruye bakabura uko bagurisha ibi nabyo ngo bikabateza igihombo.

Icyakora iby’aya makuru y’uko hari ibwiriza ryatanzwe n’akarere ribuza abahinzi gusarura bihakanwa n’umuyobozi w’aka karere UWANZWENUWE Theoneste uvuga ko biramutse byaranabaye byaba ari ikibazo cy’amakusanyirizo kuko ariyo akorana n’umuhinzi mu kugeza umusaruro we ku isoko, akavuga k obo nk’ubuyobozi icyo bitaho cyane ari ukureba niba igiciro cyagenywe cyubahirizwa.

Gusa izingiro ry’iki kibazo risa n’irishingiye ku giciro cy’ibirayi ababicuruza bemeza ko cyaguye ku isoko, nyamara aho babirangurira bagategekwa amafaranga batagomba kujya munsi mu kwishyura umuhinzi.

Aha byanze bikunze ingaruka akenshi zigaruka ku muhinzi ushobora kwemera kugurisha ku giciro kiri munsi y’icyagenwe (mu byo bakunze kwita kumwunamaho) yabyanga ibirayi bye bikabura isoko nyamara we yaramaze gushora byararangiye, aha ari naho bahera bongera kuzamura ikifuzo basaba inzego zibishinzwe kurushaho kunoza ibiciro ku masoko.

Ibirayi ni igihingwa bitoroshye guhunika igihe kirekire bituma akenshi abahinzi basarura bahita bagurisha ari n’imwe mu pamvu zituma mu gihe cy’isarura igiciro cyabyo gihita kigwa byihuse.

Indi nkuru bifitanye isano :Akarengane gakorerwa abahinzi b’ibirayi bo mu Karere ka Nyabihu



Tanga igitekerezo kuri iyi nkuru



Igitekerezo