Itabi ry’abo kwa Rwigara ryatejwe cyamunara

Kuri uyu wa Gatatu tariki ya 28 Werurwe 2018, nibwo amakarito manini asaga 7195 y’itabi ry’uruganda ‘Premier Tobacco Company Ltd’ rw’umuryango wa Rwigara Assinapol, yatejwe cyamunara agurwa na MURADO BUSINESS LTD kuri Miliyoni 512.

Nk’uko Umuhesha w’Inkiko w’umwuga yari yatanze itangazo rya cyamunara ko iri tabi rigurishwa mu gitondo cyo ku wa 28 Werurwe 2018, ni ko byagenze, igiciro fatizo ari 433,727,966 Frw ariko Murado Business LTD yariguze kuri miliyoni 512 Frw.

Anne Rwigaraga na basaza be bari bitabiriye icyamuna bagaragaje ukutishimira amafaranga riguzwe, akavuga ko agaciro karyo kari hafi miliyari y’amafaranga y’u Rwanda.

PNG - 721.3 ko
Anne Rwigaraga na basaza be bari bitabiriye icyamunara


Uyu muryango wa Rwigara wagaragaje kutishimira iyi cyamunara uvuga ko atari byo kuko amategeko avuga ko iyo umuntu atishimiye igiciro muri cyamunara ya mbere asaba ko isubikwa.

Umuhesha w’inkiko w’umwuga, Maitre VEDASTE Habimana yabasabye kwitabaza inkiko bamubwira ko n’ubundi hari urubanza ku isaha ya saa munani rwo gusubikisha iyo cyamunara.

PNG - 867.6 ko
Me Habimana Védaste, Umuhesha w’inkiko w’umwuga watanze itangazo rya cyamunara abisabwe na RRA


Mu magambo yuzuye umubabaro Anne Rwigara nawe utishimiye iyi cyamunara yavuze ko kuba umubyeyi wabo Assinapol Rwigara yararuhiye uru ruganda rukanafasha mu gufata igihugu, ibi bitari bikwiye gusa yongeraho ko nabo ibyo bakora batabizi.

Anne Rwigara yakomeje avuga ko kuri ubu nta kindi bagiye gukora uretse gutegereza Imana yonyine.

Iri tabi ryatejwe cyamunara rigaragara ko ryakozwe hagati ya Gicurasi na Nyakanga 2017 ryafatiriwe n’Ikigo cy’Igihugu Gishinzwe Imisoro n’Amahoro (RRA) mu mpera z’umwaka ushize hagamijwe kwishyuza ibirarane by’imisoro bya Miliyari esheshatu z’amafaranga y’u Rwanda, byo guhera mu 2012 uruganda ‘Premier Tobacco Company’ rubereyemo Leta.

RRA yari yatangaje ko yaganiriye n’umuryango wa Rwigara ku burenganzira bwo kwishyura umwenda mu byiciro, ugakomeza imirimo y’uruganda ariko ntiwabikora.

Itabi ryari mu bubiko bw’uruganda Premier Tobacco Company ruherereye i Gikondo muri Parc Industriel ryagombaga gutezwa cyamunara ririmo amoko atanu ari yo Premier Filter (amakarito 5553) ; Filter Star (amakarito 1033) ; Filter Star King (amakarito 328) ; Premier Super Menthol (amakarito 191) na Filter Star Soft (amakarito 90). Buri karito imwe irimo imiti (pieces) y’itabi 5000, ni ukuvuga imiti irengaho miliyoni 35 ku giteranyo cy’amakarito yose.

PNG - 965.9 ko
Amakarito y’itabi arenga 7000 ry’abo kwa Rwigara niyo yari ateganyijwe ko atezwa cyamurana

Komiseri Mukuru wa RRA, Tusabe Richard, aherutse kubwira abanyamakuru ko umuryango wa Rwigara hari abandi bantu benshi cyane cyane amabanki bawishyuza imyenda ubafitiye, ikaba ari imwe mu mpamvu yatindije cyamunara.

Muri Mutarama 2018, Umuyobozi w’uruganda ‘Premier Tobacco Company’, Anne Rwigara, yari yatanze ikirego mu Rukiko rw’Ubucuruzi rwa Nyarugenge asaba ko rwategeka RRA gukuraho inzitizi zose yashyize ku ruganda zirimo kuba icyo kigo cyarafatiriye inyandiko, ibitabo by’ibaruramari na mudasobwa zari ziri mu biro by’umuyobozi mukuru w’uruganda, kuba RRA yarafunze ububiko bwari burimo ibicuruzwa bikaba byarangirikaga ndetse no kuba yaritambitse amafaranga ari kuri konti z’urwo ruganda ziri muri Equity Bank no muri Ecobank, byose bigahagarika imirimo.

Muri Gashyantare, Urukiko rwatesheje agaciro icyo kirego rwanzura ko nta shingiro gifite, rushingiye ko ibyo RRA yakoze byose byari byubahirije amategeko maze Umucamanza avuga ko ibikoresho RRA yafatiriye bidakwiriye gusubizwa mu gihe urwo ruganda rukurikiranyweho icyaha cyo kunyereza umusoro kandi rutaragikurwaho.

PNG - 524 ko
Uruganda ‘Premier Tobacco Company Ltd’ rw’umuryango wa Rwigara Assinapo

@Umubavu.com



Tanga igitekerezo kuri iyi nkuru



Igitekerezo