Akarengane gakorerwa abahinzi b’ibirayi bo mu Karere ka Nyabihu

Kuba abagena ibiciro by’umusaruro w’ibirayi babigena ku muhinzi gusa ariko ntibabigene ku isoko ricururizwaho ibyo birayi nirwo rwireguzo rw’abafite amakusanyirizo n’abacuruzi b’ibirayi bashinjwa kuryamira abahinzi.

Ibi ni bimwe mu byagaragarijwe mu nama yahuje ubuyobozi bw’akarere ka Nyabihu n’abafite aho bahuriye n’ubucuruzi bw’ibirayi kuri uyu wa mbere tariki ya 27 Ugushyingo 2017.Inama ariko ntiyashoboye kubonera igisubizo iki kibazo.

Abahinzi bo mu karere ka Nyabihu bataka icyo bita amanyanga akorwa n’abacuruzi babagurira ibirayi ku mafaranga 100 ku kiro nyamara mu rwego rwo guhisha ku babaguriye ku giciro kiri munsi y’igiteganyinyijwe bakabasinyisha ku ngufu ko babaguriye ku mafaranga 140.

Nyuma y’inama yahejwemo itangazamakuru yahuje ubuyobozi bw’akarere ka Nyabihu n’abafite aho bahuriye n’ubucuruzi bw’ibirayi, umuyobozi w’aka karere Uwanzwenuwe Theoneste yatangarije TV1 ducyesha iyi nkuru ko hari abantu batanu barimo gukorwaho iperereza ku makosa nk’aya yemeza ko akenshi ahemberwa n’abantu ngo bitwa “abachercheur” basigaye bitambika hagati y’umuhinzi n’ikusanyirizo ari naho kuryamira umuhinzi bituruka.

N’ubwo bamwe mu bacuruzi bemera ko bajya basinyisha abaturage amafanga adahuye n’ayo babaguriyeho mu byukuri abandi bakabica ku ruhande, icyo bahurizaho ni uko intandaro ya byose ari uko bategekwa igiciro bagomba kuguriraho umuhinzi nyamara bo ntihagira ubagenera icyo bagomba kugurishaho ibi bigatuma hari ubwo babigeza ku isoko bagurirwa ku giciro kiri munsi y’icyo baranguyeho.

Akarere ubwako kagaragaje ko kadafitiye ubushobozi kuri iki kibazo ari nayo mpamvu hemejwe ko mu gihe ku bafatanye n’izindi nzego zifite ububasha bwo kugena ibiciro ku masoko nta kiragikorwaho aba bacuruzi bagomba gukomeza kugurira umuhinzi ku mafaranga 145 Frw ku kiro.

Aba bacuruzi b’ibirayi n’abafite amakusanyirizo mu nshingano basaba abagena igiciro cyo kuguriraho umuhinzi ko bajya babanza bakareba ni ibiciro ku isoko kuko hari ubwo nabo bisanga bakorera mu gihombo.



Tanga igitekerezo kuri iyi nkuru



Igitekerezo
Claude Kuya 1er-12-2017

Biba bitangaje nuko mutibera kuri trre arko urwana nimyaka yawe uyikorera warangiza ihihe cyokujya gusarura ukabanza wanjya guhendahenda usaba isoko bakakubwirako niba ushaka kobyihuta bagomba kuguha kugiciro gito. Kd wwe usinyira ikiri hejuru wababaza bakakubwirako asigaye arayi kusanyirizo

Gautier Kuya 30-11-2017

Jye sindanumva impamvu umuntu yahinga ibirayi Mu mulima WE YIGURIYE nyuma umuntu utanazi uko ikirayi mu mulima gisa akaba ariwe ugena igiciro.
Ibirayi bigera Ku isoko bihenze kubera izo "nzego" zose biba byaciyemo

KK Kuya 29-11-2017

Amakusanyirizo ntabwo akora ibyo yagakwiye gukora.
ubundi yagiyeho kugirango nabahinzi bibirayi bajye basora.ariko byabaye guseseka ino mubaturage bakaribwa nabifite

Clenie Kuya 29-11-2017

Iki kubazo cy’igurishwa ry’umusaryro w’ibirayi kimaze igihe kirekire kuva hashyirwaho ikiswe amakusanyirizo.

Abatsindiye amasoko aribo bene amakusanyirizo usanga bifatira abahinzi nk’abacakara babo. Umuhinzi ahinga byose abyishakiye ariko yakweza amakusanyirizo akamushyiraho itegeko ngo agomba kugurisha umusaruro we ari uko abasigiye inyungu usanga basaba hagati ya 15-20/kg. Kuva ikitwa amakusanyirizo cyatangira nta muhinzi ukigira uburenganzira ku byo yiyejereje.

Nge mbona bikwiye gukurikiranwa kuko abaturage ntako batagize babibaza ariko ubuyobozi bukabereka ko butabyitayeho.

Amakusanyirizo ntawuyarwanya ariko nanone bakurikirane uburyo akora kuko niba yarashyiriweho kurengera inyungu z’umuhinzi, ntibyakozwe ahubwo yimakaje umuco wo gushyigikira abarya batakoze(abahagarariye amakusanyirizo) aka wa mugani w’ibifi binini.

Clenie Kuya 29-11-2017

Iki kubazo cy’igurishwa ry’umusaryro w’ibirayi kimaze igihe kirekire kuva hashyirwaho ikiswe amakusanyirizo.

Abatsindiye amasoko aribo bene amakusanyirizo usanga bifatira abahinzi nk’abacakara babo. Umuhinzi ahinga byose abyishakiye ariko yakweza amakusanyirizo akamushyiraho itegeko ngo agomba kugurisha umusaruro we ari uko abasigiye inyungu usanga basaba hagati ya 15-20/kg. Kuva ikitwa amakusanyirizo cyatangira nta muhinzi ukigira uburenganzira ku byo yiyejereje.

Nge mbona bikwiye gukurikiranwa kuko abaturage ntako batagize babibaza ariko ubuyobozi bukabereka ko butabyitayeho.

Amakusanyirizo ntawuyarwanya ariko nanone bakurikirane uburyo akora kuko niba yarashyiriweho kurengera inyungu z’umuhinzi, ntibyakozwe ahubwo yimakaje umuco wo gushyigikira abarya batakoze(abahagarariye amakusanyirizo) aka wa mugani w’ibifi binini.

karega Kuya 29-11-2017

Uwateje akajagari ni uwazanye ayo makusanyirizo.none ingaruka zitangiye kwigaragaza nizindi zizaza