Imwe mu mitungo  ya Kaminuza y’u Rwanda igiye kwegurirwa  Uturere

Nyuma y’amavugurura yabaye muri Kaminuza y’u Rwanda, imwe mu mitungo yayo itagikoreshwa igiye kwegurirwa uturere ibarizwamo kugira ngo ibashe kubyazwa umusaruro.

Ibi bije nyuma y’amavugurura iyi Kaminuza iherutse gukora, igahuza amwe mu makoleji yari ayigize akava kuri atandatu akaba atanu ndetse hamwe mu hatangirwaga amasomo hagakurwaho.

Hamwe mu higiraga amwe mashami ya Kaminuza yavanyweho harimo nka Byumba, Kibungo, Kabgayi na Nyamishaba.

Aya mashami yakuweho yari afite inyubako akoreramo, ibikoresho yakoreshaga n’ibindi.

Kaminuza y’u Rwanda ivuga ko iyo mitungo izahabwa uturere ibarizwamo tukayibyaza umusaruro.

Ukuriye ishami ry’itumanaho muri Kaminuza y’u Rwanda, Mike Karangwa yabwiye Ikinyamakuru The Eastafrican ko mu minsi ya vuba Kaminuza izasinya amasezerano n’uturere kugira ngo dutangire gukoresha iyo mitungo.

Karangwa yakomeje avuga ko nubwo hari imitungo izatangirwa ubuntu, ngo hari indi Kaminuza izasaba ko igira icyo ihabwa bitewe n’inyungu yavagamo.

Yatanze urugero rwa bimwe mu bikorwa byifashishwaga mu bushakashatsi nk’ibyuzi by’amafi biri mu Karere ka Huye, aho amafi yavagamo yagurishwaga ku baturage bahaturiye.

Kaminuza y’u Rwanda nyuma y’amavugurura yasigaranye Koleji yigisha amategeko, ubukungu n’imiyoborere, CLEG (College of Law, Economics and Governance), Koleji y’Ubuvuzi n’Ubumenyi mu by’ubuzima, CMHS (College of Medicine and Health Sciences), Koleji yigisha iby’ubumenyi n’ikoranabuhanga, CST (College of Science and Technology), Koleji y’Uburezi n’imicungire y’ububiko, CELS (College of Education and Library Sciences), na koleji y’ubuhinzi n’ubumenyi mu buvuzi bw’amatungo n’ ibijyanye n’ibidukikije, CAEVM (College of Agriculture, Environment and Veterinary Medicine).

Umuyobozi Wungirije wa Kaminuza y’u Rwanda ushinzwe amasomo n’ubushakashatsi, Prof Nelson Ijumba aherutse kubwira itangazamakuru ko izi mpinduka zatewe n’uko Kaminuza y’u Rwanda yifuza kunoza imikorere yayo no kugabanya amafaranga yakoreshwaga bitari ngombwa.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo