Venezuwela : Abatavuga rumwe na Leta bahawe gasopo yo kuzitabira amatora yo muri 2018

Perezida w’igihugu cya Venezuwela, Nicolas Maduro, avuga ko amashyaka akomeye atavuga rumwe na Leta mu gihugu abujijwe kugira uruhare mu matora y’umukuru w’iguhugu mu mwaka utaha.

Nicolas Maduro yavuze ko amashyaka yagize uruhare mu matora y’abayobozi b’uturere ku Cyumweru ari yo yonyine azahatanira umwanya w’umukuru w’igihugu mu matora ateganyijwe mu mwaka utaha wa 2018.

Abayobozi b’amashyaka Justice First, Popular Will na Democratic Action yanze kwitabira amatora avuga ko uburyo yari ateguye bwari bubogamye cyane.

Perezida Maduro atsindagira ko ubwo buryo bwari bwizewe kandi bwuzuye.
Mu ijambo rye ku Cyumweru, Perezida Nicolas Maduro yavuze ko amashyaka atavuga rumwe na Leta yazimiye ku ikarita ya politike mu gihugu ayoboye.

Mu magambo ye yagize ati "Ishyaka ritagiye mu matora uyu munsi kandi ryasabye kutitabira amatora ntirishobora kongera kuyitabira ukundi."

Mu kwezi kwa Cumi, amashyaka atatu akomeye atavuga rumwe na leta yatangaje ko atazitabir amatora yo ku Cyumweru, avuga ko byaba ari ugutera ingabo mu bitugu ubutegetsi bw’igitugu bwa Bwana Maduro.

Perezida Maduro avuga ko ishyaka rye ryatsinze imyanya 300 kuri 355 y’abayobvozi b’uturere iri guhatanirwa. Akanama k’amatora kavuga ko ubwitabire buri kuri 47%.
Venezuwela imaze igihe mu bibazo by’ubukungu bitifashe neza birimo ibura ry’ibintu by’ingenzi by’ibanze.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo