Umutwe w’inyeshyamba ushaka guhirika Museveni wihanangirije igisirikare cya Uganda

Umutwe w’Inyeshyamba witwa SCAD (Super Coalition Against the Despots) uvuga ko uzatuza ari uko uhiritse ubutegetsi bwa Perezida Museveni , wihanangirije igisirikare cya Uganda uvuga ko nigikomeza gukora ibikorwa byo guhohotera abaturage witeguye gushoza intambara.

Umutwe wa SCAD (Super Coalition Against the Despots) uvuga ko ufite ibirindiro mu migabane ine igize Isi , ukaba uvuga ko igisirikare cya Uganda(UPDF) cyishoye mu bikorwa bihonya uburenganzira bwa muntu ndetse akaba ari nabyo ushaka guhagarika.

Mu itangazo uyu mutwe washyize ahagaragara rigira riti’’Ushyigikiye,ukorera, uhagarariye ndetse n’urengera inyungu z’akazu, mu buryo buziguye cyangwa butaziguye nko kujya muri gahunda zigamije kugumisha Perezida Museveni ku butegetsi , ubu butegetsi nibwo bugenderewe kandi bugomba kwicara buzi ko bwaburiwe’’

Umuvugizi w’Igisirikare cya Uganda,Brig Richard Karemire yabwiye Chimpreports dukesha iyi nkuru ko hakozwe iperereze kuri uyu mutwe kugira ngo harebwe nibaba koko ubaho ati’’Iperereza rigombaga kugaragaza impamvu kakana uri ahantu runaka avuga intambara mu guhungabanya amahoro n’umutekano’’

Karemira ashimangira kp nta mutwe w’Inyeshyamba uzigera utsinda urugamba rwo gukuraho ubutegetsi bwazanye impinduka mu gihugu ndetse ko uyu mutwe uri guta igihe kuko igisirikare cya Uganda gikorana n’abaturage ndetse akaba ariho gikomora ubushobozi bwo gutsinda imitwe ishaka kurwanya Uganda nka LRA, UPA, FOBA, NALU n’indi itandukanye.

Ku bijyanye n’Ihindurwa ry’Itegeko Nshinga ,Karemire yavuze ko nta nzira y’ubusamo ihari ahubwo ibibazo birebena na ryo bigomba gukemurwa n’Abadepite kuko aribo ntumwa za rubanda.

Ejo ku wa Mbere umuvugizi w’uyu mutwe wa SCAD, Joel Wakayima uba muri Netherlands yavuze ko uyu mutwe wamaramaje gahunda yawo yo gukura Museveni ku butegetsi ikomeje.

Ati’’Ni uburyo bwo kubaburira. Igisirikare cyateye intambwe idasubira inyuma mu ntambara cyashoje ku baturage kandi cyari gishinzwe kubarinda’’

Avuga ko uburyo Abadepite basohowe mu Nteko ishinga Amategeko n’inzego z’umutekano ubwo bageregezaga kwamagana ihindurwa ry’Itegeko Nshinga ku ngingo y’imyaka Perezida atagomba kurenza mu rwego rwo kugumisha Museveni ku butegetsi.

SCAD ivuga ko itagomba kwihanganira uburyo abashinzwe ubutasi bakomeje kwandagaza abapolisi babafunga mu buryo budakurikije amategeko mu rwego rwo gukandagira abasivile.Ashimagira ko bashaka gusubizaho ukwishyira ukizana k’umuturage ndetse Igisirikare kikaba icy’abaturage nk’uko bigenwa n’Itegeko Nshinga rigenga Uganda aho kubagendera hejuru.

Sibyo gusa kandi uyu mutwe ntiwishimiye ibikomeje kubera muri Uganda aho inzego z’umutekano zihohotera abigaragambya bamagana ihindurwa ry’Igingo iri mu Itegeko Nshinga rigenga Uganda igena imyaka y’amavuko Perezida w’iki gihugu agomba kuba afite mu rwego rwo kugumisha Museveni ku butegetsi.

Chimpreports ikomeza ivuga ko Umuvugizi w’uyu mutwe ,Wakayima ari umusivile nta myitozo ya gisirikare yigeze , yayoboye itsinda ryabantu ryagejeje ikirengo mu Rukiko Mpuzamahanga Mpanabyaha(ICC) basaba ko Perezida Museveni yashyirwaho ibyaha bifittanye isano no guhonya uburenganzira bwa muntu.Gusa ubu busabe bwateshejwe agaciro kuko urukiko rwasanze nta bimenyetso.

Umubavu.com



Tanga igitekerezo kuri iyi nkuru



Igitekerezo