Umuhungu wa Odinga yahaye gasopo igipolisi cya Kenya

Nyuma yuko igipolisi gikomeje kugenda gihangana bikomeye na bamwe mu bayoboke ba Raila Odinga utavuga rumwe n’ubutegetsi buriho, umuhungu we Raila Junior Odinga yahaye igipolisi cya Kenya gasopo nyuma yuko gishaka kuzaburizamo igikorwa cy’abayoboke ba se cyo kuzigabiza imihanda ku munsi w’ejo ubwo bazaba bakira umuyobozi wabo avuye muri Amerika aho yari yitabiriye inama zitandukanye.

Biteganyijwe ko Raila Odinga azasesekara mu gihugu cye ku munsi w’ejo tariki ya 17 Ugushyingo 2017 akubutse muri Leta Zunze Ubumwe za Amerika aho yari yitabiriye inama zitandukanye. Akigera muri Amerika, Raila Odinga ntiyariye iminwa kuko akigera ku kibuga cy’indege I Washington, yanenze bikomeye amahanga avuga ko ntacyo yafashije Kenya mu migendekere mwiza y’amatora ubwo yasubirwagamo ku wa 26 z’ukwezi gushize.

Kuri ubu abayoboke ba Odinga bari gutegura ibirori by’akataraboneka byo kuzamwakira ubwo azaba asesekaye ku kibuga cy’indege cya Jomo Kenyatta ari byo byatumye igipolisi gishaka uburyo bwose cyazaburizamo ibi bikorwa cyane ko bishobora guteza imvururu mu gihugu zishobora guhitana ubuzima bwa bamwe mu banyagihugu.

Igipolisi nacyo cyavuze ko kitazorohera na gato aba bayoboke ba Odinga akaba ari nacyo cyatumye umuhungu we Raila Junior ahangana nacyo ku buryo bukomeye avuga ko nta kizababuza kwakiriza impundu n’amashyi ise.

Mu gihe igipolisi cya Kenya gishaka kuburizamo ibi birori byo kwakira Odinga, umuhungu we Raila Junior we yahamagariye abayoboke ba se bose gukomeza kwiyegeranya bitegura kandi ku bwinshi.

PNG - 295.6 ko
Raila Junior ukomeje guhangana n’igipolisi ahamagarira abayoboke ba se kwisuganya bitegura kwakira ise


Raila Junior yavuze kandi ko uretse n’abayoboke ba se, bafite umuryango mugari nawo batazabuza kwakira umubyeyi wabo ubwo azaba avuye ku rugendo.

Abicishije kuri Twitter ye, Raila Junior yagize ati “n’igipolisi nticyabasha kumenya umubare w’abana papa afite bazaza kumwakira”.

Mukuru w’igipolisi cya Kenya, Joseph Boinnet yavuze ko nta muyoboke n’umwe wa Raila Odinga uzemererwa kwinjira muri stade yateganyijwe ko azakirirwamo yewe no ku kibuga cy’indege aho azururukira.

PNG - 1 Mo
Raila Odinga asanzwe afite abayoboke batari bakeya mu gihugu cya Kenya


Raila Junior kandi yabwiye abayoboke ba se ko igipolisi gifite inshingano zo gucunga umutekano w’abantu n’ibintu byabo bityo kitagomba kugira uwo gihutaza, gishyiraho igitutu cyangwa igitugu mu buryo ubwo ari bwo bwose.

Ibi byose byatumye kandi, Joseph Boinnet ukuriye igipolisi cya Kenya aburizamo inama y’ishyaka rya NASA yari iteganyijwe kuba kuri uyu munsi ku wa kane tariki ya 16 Ugushyingo 2017avuga ko bidakurikije amategeko.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo