Umuhungu wa Gaddafi agiye kwiyamamariza kuyobora Libya

Saif al-Islam Gaddafi, umuhungu w’uwahoze ari Perezida w’igihugu cya Libya, Muammar Gaddafi, yatangaje ko agiye kwiyamamariza kubobora icyo gihugu mu matora ateganyijwe mu 2018.

Umuvugizi we, Bas Alm al-Hashimi al-Sul, yabwiye itangazamakuru ku Cyumweru ko Saif al-Islam Gaddafi aziyamamaza mu matora y’Umukuru w’Igihugu yongeraho ko azahita atangaza gahunda afite zijyanye n’amahame y’Umuryango w’Abibumbye.

Ikinyamakuru Novinite cyanditse iyi nkuru, kivuga ko Saif yari yarashyiriweho impapuro zo kumuta muri yombi n’Urukiko Mpuzamahanga Mpanabyaha, ashinjwa ibyaha byibasiye inyokomuntu.

Saif w’imyaka 44 ni umuhungu uvuka ku mugore wa kabiri wa Muammar Gaddafi akaba yitezweho kuba igikomangoma ndetse akanagarura icyizere mu baturage ba Libya.

PNG - 803.8 ko
Umuhungu wa Gaddafi, Saif al-Islam Gaddafi ugiye kwiyamamariza kuyobora Libya


Yize ibijyane n’ubwubatsi muri Austriche no mu Bwongereza. Afite impamyabumenyi y’ikirenga mu bijyanye na Philosophie yakuye muri Kaminuza ya Londres, yamaze igihe ayoboye umuryango wakoraga mu izina rya se waharaniraga irekurwa ry’abantu bose batwawe bunyago ku isi.

Saif al-Islam yamenyekanye cyane muri Bulgarie ubwo yaganiraga na guverinoma ya Ivan Kostov na Simeon Saxe-Coburg-Gotha bahoze bayobora icyo gihugu, kugira ngo Libya irekure abaganga ba Bulgarie bari bamaze imyaka umunani bafungiye muri icyo gihugu, bakorerwa iyicarubozo banakatirwa urwo gupfa.

Abo baganga bari bafungiye uruhare bakekwagaho rwo gutera Virusi ya Sida abana ba Libya mu Mujyi wa Benghazi.

Saif al-Islam Gaddafi yavukiye i Tripoli muri Kamena 1972, akaba umuhungu wa kabiri wa Col. Muammar Gaddafi, muri Gashyantare 2011, hatangiye amakimbirane mu gihugu cyari kiyobowe na Se.

Muri Kamena 2011, Urukiko Mpuzamahanga Mpanabyaha rwatanze impapuro zo kumuta muri yombi rumushinja ibyaha byibasiye inyokomuntu.

Muri Kanama 2011, yavuye mu Mujyi wa Tripoli agwa mu mitwe y’abarwanyaga ubutegetsi bwa Gaddafi. Mu Ukwakira 2011, Se n’umwana muto wabo barishwe.

Ku wa 19 Ugushyingo 2011 yafashwe n’inyeshyamba ashaka guhungira mu Majyepfo ya Niger afungirwa mu Mujyi wa Zintan.

Muri Nyakanga 2015 , yakatiwe gufungwa burundu n’urukiko rwa Tripoli.

Muri Kamena 2017 byatangajwe ko yarekuwe.

Col Muammar Muhammad Abu Minyar Gaddafi bamwe bafataga nk’intwari ya Afurika abandi bakamufata nk’umunyagitugu w’ikinyejana, yishwe ku itariki ya 20 Ukwakira 2011, mu Mujyi wa Sirte muri Libya.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo