Trump yibasiye bikomeye Minisitiri w’intebe w’u Bwongereza kuri Twitter

Perezida Donald Trump wa Amerika yabwiye Minisitiri w’Intebe w’u Bwongereza Theresa May kwita cyane ku byerekeye iterabwoba mu gihugu cye akareka kunenga video z’imitwe y’abahezanguni (extreme droite) yigisha urwango aheruka gukwirakwiza ku mbuga nkoranyambaga, ubutumwa bwafashwe nko gusuzugura bikomeye uyu muyobozi.

Kuri Twitter ye, Donal Trump yagize ati “winyibandaho cyane, ahubwo ita cyane ku iterabwoba rikwirakwizwa n’imitwe ifite amatwara akaze y’idini ya Isilamu mu gihugu cyawe".

Nkuko BBC dukesha iyi nkuru yabyanditse, Perezida wa Amerika yaherukaga kohereza video eshatu zibiba urwango zari zashyizwe ku rubuga rwa Twitter n’iyo mitwe y’iterabwoba mu gihugu cy’u Bwongereza. Ibi byatumye Theresa May avuga ko Trump yakoze amakosa.

Nubwo ibi byose bivugwa nyamara Amerika n’igihugu cyu Bwongereza bisanzwe bifitanye umubano ukomeye bivugwa ko udasanzwe.

Theresa May yabaye umutegetsi wa mbere wo mu bindi bihugu wabonanye na Trump mu biro bye muri Maison Blanche.

PNG - 258.3 ko
Ubu ni ubutumwa Trump yandikiye Theresa May kuri Twitter


Video zakwiragijwe na Trump ufite abantu bamukurikira kuri Twitter basaga miliyoni 40, zari zashyizwe kuri Twitter na Jayda Fransen, icyegera cy’uyoboye umutwe w’iterabwoba wo mu Bwongereza witwa Britain First, umutwe watangijwe n’abayoboke ba kera b’abahezanguni (extreme droite) bo mu ishyaka rya wa BNP (British National Party).

Ibi kandi bibaye mu gihe umugore witwa Frensen w’imyaka 31 y’amavuko wo mu Bwongereza ajyanywe mu nkiko azira gukoresha amagambo ateye ubwoba avanze n’ibitutsi mu ijambo yavugiye mu nama yabereye mu mugi wa Belfast.

Abanyepolitike bo mu Bwongereza barimo na Musenyeri w’i Cantebury Justin Welby bavuze ko bibabaje kubona Perezida Trump afasha mu kumenyekanisha umutwe ufite amatwara akaze y’idini ya Isilamu.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo