Trump yanenze bikomeye imikorere ya FBI muri iki gihe

Perezida wa Leta Zunze Ubumwe za Amerika, Donald Trump, yanenze n’uburakari bwinshi mu buryo bukomeye ibiro bishinzwe iperereza imbere mu gihugu, FBI avuga ko ari ubwa mbere mu mateka isura yabo igaragara nabi.

Ku rubuga rwe rwa Twitter, Trump yavuze ko isura y’uru rwego yanduye cyane ku buryo ari bwo bwa mbere bibaye mu mateka yarwo.

Yahakanye kandi ko atasabye James Comey yirukanye ku buyobozi bwa FBI guhagarika iperereza kuri Michael Flynn wari umujyanama we mu rwego rw’umutekano.

Trump yirukanye Flynn kuri uwo mwanya kubera kubeshya FBI ku birebana no kuba yaravuganye n’abayobozi b’u Burusiya.

Bwana Trump yongeye kwotswa igitutu ku birebana n’ibyo yari azi cyangwa se yavuze ku barusiya Flynn yavuganye nabo.

Trump asa nk’aho yahinduye ibyo yavuze mbere mu butumwa bwa Twitter yavugagamo ko yari azi ko Bwana Flynn yabeshye FBI.

Abanenga Trump baramushinja kuba yarabangamiye ubucamanza igihe yasabaga James Comey kudakurikirana Michael Flynn.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo