Tanzania irishyuzwa abayobozi 4  b’umutwe  wa FPB  urwanya u Burundi

Inama y’igihugu ishinzwe iyubahirizwa ry’amasezerano ya Arusha CNARED irasaba Leta ya Tanzaniya kudakomeza guceceka ahubwo igatanga amakuru ku bayobozi bane b’umutwe wa FPB urwanya u Burundi bivugwa ko bafatiwe ku butaka bwayo ubu aho baherereye hakaba hatazwi.

CNARED ivuga ko Tanzania yagakwiye kurinda impunzi ziri ku butaka bwayo hisunzwe amategeko mpuzamahanga agenga impunzi.

Mu itangazo rya CNARED yashyize ahagaragara tariki ya 1 Ugushyingo 2017 rivuga ko tariki 21 Ukwakira 2017abayobozi bane b’umutwe FPB bafashwe bakajyanwa ahantu hatazwi.
Muri iryo tangazo rya CNARED isaba Reta ya Tanzaniya kugaragaza ukuri, niba
aba bayobozi ba FPB barinjijwe mu Burundi cyangwa ko bakiri ku butaka bwayo ndese ikibutsa ko icyaba kuri aba bantu icyo ari cyo cyose cyabazwa Tanzania isanzwe ariyo yakira ibiganiro bihuza impande zihanganye mu Burundi.

CNARED imenyesha ko ifatwa ry’aba bayobozi bane b’umutwe wa FPB rihindanya isura y’Igihugu cya Tanzania gisanzwe cyakira impunzi zivuye mu bihugu byo mu Karere ndetse bikaba byatuma gitakarizwa icyizere.

JPEG - 30.1 ko
Général-major Jérémie Ntiranyibagira umukuru w’umtwe wa FPB wahoze witwa FOREBU

Abayobozi ba FPB batawe muri yombi ni General Major Jeremie NTIRANYIBAGIRA, Colonel Edouard NSHIMIRIMANA, Capitaine Libere NZEYIMANA na Liberate NIJIMBERE hakaba harakomeje gucicikana amakuru atandukanye avuga ko baba barashyikirijwe u Burundi.

Haba ku ruhande rwa Leta y’Uburundi cyangwa ku ruhande rwa Leta ya Tanzaniya bose ntawigeze yifuza kugira byinshi abivugaho nk’uko bitangazwa n’ibinyamakuru byandikirwa mu Burundi.

JPEG - 32.2 ko
Lieutenant-Colonel Édouard Nshimirimana wungirije umuyobozi wa FPB

Aho u Burundi buvuga ko ibyabereye ku butaka bwa Tanzania ariyo igomba kubibazwa mu gihe Tanzania yo ivuga ayo makuru ntayo izi.

Gabriel Habineza/Umubavu.com



Tanga igitekerezo kuri iyi nkuru



Igitekerezo