Raila Odinga yamaganye ibyavuye mu matora ashinja Kenyatta kwiha ubutegetsi

Muri Kenya, umukuru w’abatavuga rumwe na leta, Raila Odinga, yahamagariye abayoboke be gukomeza gukora imyigaragambyo mu mahoro nyuma y’ibyavuye mu matora y’umukuru w’igihugu.

Yongeye gusubiramo ko amatora yabaye mu cyumweru gishize yatsinzwe na Perezida Uhuru Kenyatta ari ikinamico.

Yanenze akanama gashinzwe amatora agashinja guhimba imibare y’abitabiriye ayo matora.

Yananenze kandi Perezida Kenyatta avuga ko yihaye ubutegetsi.

Bwana Kenyatta yegukanye amajwi 98% nyuma yaho Raila Odinga n’abayoboke be banze kwitabira ayo matora.

Perezida Uhuru Kenyatta yavuze ko ayo majwi yongeye kwerekana icyo abaturage bifuza.

Bwana Odinga kandi yavuze ko umutwe we wa politiki ushaka ko haba andi matora mashya ariko nta bindi bisobanuro yabitanzeho.

Amatora y’umukuru w’igihugu yabaye kuwa kane w’icyumweru gishize yari asubiwemo kubera ko ayabaye mu kwezi kwa munani agatsindwa na Perezida Uhuru Kenyatta yari yagizwe impfabusa n’urukiko rw’ikirenga.



Tanga igitekerezo kuri iyi nkuru



Igitekerezo