Raila Odinga arashaka Leta y’inzibacyuho muri Kenya

Umukuru w’ishyaka NASA n’amashyirahamwe atavuga rumwe n’ubutegetsi buriho muri Kenya, Raila Odinga, yavuze ko yifuza ko hashyirwaho Leta y’inzibacyuho akaba ari yo iyobora igihugu mu mezi atandatu mu gihe hagishakwa umuti w’ibibazo bya politike biri mu gihugu.

Bwana Odinga yanze kwitabira amatora yasubiwemo mu kwezi gushize asaba ko mbere yuko ayo matora aba hahindurwa amwe mu mategeko agenga amatora ndetse na bamwe mu bayobozi bagize akanama gashinzwe gutegura amatora bagahindurwa kugira ngo amatora y’umukuru w’igihugu agende neza.

Uyu munyapolitike ari mu rugendo mu gihugu cya Leta Zunze Ubumwe za Amerika, yavuze ko yiteguye kugirana ibiganiro na Perezida Uhuru Kenyatta ku bijyanye no guhindura Itegeko Nshinga muri gahunda yo kwirinda ubushyamirane bushobora kwaduka mu gihugu hagati y’impande zombi.

Bwana Kenyatta niwe yatangajwe ko yatsinze amatora yasubiwemo ku itariki ya 26 Ukwezi kwa 10 n’amajwi asaga miliyoni 7.5 bingana na 98%, mu gihe Raila Odinga we yanze kuyitabira.

Abanyagihugu 39% nibo bitabiriye amatora ugereranije n’abari bitabiriye amatora ya mbere, Raila n’abamushigikiye bavuze ko bayibwemo amajwi.

Raila Odinga aranenga cyane uburyo bwashyizweho buvuga uko amatora y’umukuru w’igihugu agomba kugenda.

Agira ati “Amatora ashingiye ku mukuru w’igihugu adakozwe neza atuma hagwira amacakubiri ashingiye ku moko, bitewe nuko imiryango yumva ko yatekana ari uko hari umuntu wabo uri hejuru".

Odinga yipfuza ko ubutegetsi butaja mu maboko y’umuntu umwe bityo agasaba ko Itegeko Nshinga ryemejwe mu mwaka wa 2010 ryavugururwa.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo