Perezida wa Liberia Sirleaf yirukanywe igitaraganya mu ishyaka azira kudashyigikira Weah

Ellen Johnson Sirleaf witegura kurangiza Manda ye ari Perezida wa Liberia, yirukanywe igitaraganya mu ishyaka rye rya Unity Party, ashinjwa kuba atarashyigikiye umukandida iri shyaka ryari ryatanze mu guhatana mu matora ya Perezida aheruka ahubwo agashishikariza abantu kutamutora.

Ku wa 28 Ukuboza 2017 Komisiyo y’Amatora muri Liberia yatangaje ko George Weah wamamaye muri ruhago ariwe watorewe kuba Perezida, ahigitse Joseph Boakai wari watanzwe n’ishyaka Unity Party rya Ellen Johnson.

BBC dukesha iyi nkuru yanditse ko Umuvugizi wa Unity Party, Mohammed Ali, yatangaje ko Ellen Johnson, umugore wa mbere wabaye Perezida ku mugabane wa Afurika, yirukanywemo ashinjwa gukora ibinyuranije n’Itegeko ry’Ishyaka, akagambanira Joseph Boakai wari uhagarariye ihuriro ry’amashyaka, agatsindwa kandi yari amaze imyaka isaga 12 ari Visi Perezida.

PNG - 443.8 ko
Ellen Johnson Sirleaf wirukanywe mu ishyaka rye azira ubugambanyi


Kugeza ubu, Ellen Johnson wakunzwe n’abatari bake mu gihugu no hanze yacyo ubwo yari Perezida, kubera uruhare yagize mu kugarura umutekano nyuma y’intambara zabaye muri iki gihugu cyatujwemo abavanywe mu bucakara mu kinyejana cya 19, nta kintu aratangaza ku bijyanye n’iyirukanwa mu ishyaka rye.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo