Perezida wa Angola yirukanye umwana w’uwo yasimbuye ku mirimo ye

Perezida wa Angola Joao Lourenco yakuye mu bunyamabanga Isabel Dos Santos, umukobwa w’uwo yasimbuye ku butegetsi (Jose Eduardo Dos Santos), mu buyobozi bw’ishyirahamwe ry’igihugu ry’ibikomoka kuri Peteroli ryitwa Sonangol.

Isabel Dos Santos asanzwe azwi cyane kuko ari we mugore wa mbere utunze agatubutse ku mugabane wa Afrika nubwo ashinjwa kuba ubutunzi bwe abukomora muri ruswa yaka abantu yitwaje umwanya afite. Ibi byose arabihakana akavuga ko ubutunzi bwe abukura ku mafaranga ahembwa ndetse no kubw’umuryango we.

Ise, Jose Eduardo Dos Santos, yamaze ku butegetsi hafi imyaka 40 akaba abuvuyeho mu kwezi kwa kenda mu mwaka ushize.
Uyu mugore agiye ku rutonde rw’abandi, Perezida Lourenco amaze iminsi yirukana ku mirimo yabo.

Perezida wa Angola, Joao Lourenco yavuze ko agiye kurwanya yivuye inyuma ingeso ya ruswa. Abanyamakuru babikurikiranira hafi bo bavuga ko ashaka kugabanya umubare w’abakoze bakomoka mu muryango wa Dos Santos muri politike y’igihugu ayoboye.

Angola nicyo gihugu cya kabiri ku mugabane wa Africa gicukura Peteroli nyinshi gusa mu minsi ishize ubu ubutunzi bwacyo buheruka kwibasirwa n’igabanuka ry’igiciro cya Peteroli ku isoko mpuzamahanga.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo