Perezida Vladimir Putin yatorewe kongera kuyobora u Burusiya

Mu matora yabaye kuri iki Cyumweru tariki ya 18 Werurwe 2018, Vladimir Putin wari usanzwe ayobora igihugu cy’u Burusiya yongeye gutsinda amatora y’Umukuru w’Igihugu bityo akaba agiye kuyobora igihugu muri manda y’imyaka itandatu iri imbere.

Putin wayoboye u Burusiya kuva mu 1999 asimburanya kuba Perezida na Minisitiri w’Intebe, afite amajwi ari hejuru ya 76%.

BBC yanditse ko mu ijambo yagejeje ku mbaga yari iteraniye i Moscow, Putin yavuze ko abamutoye bazirikanye ibikorwa yabagejejeho mu myaka ishize.
Ubwo yari abajijwe n’itangazamakuru niba azongera kwiyamamaza mu yindi manda y’imyaka itandatu, yavuze ko iki kibazo gisekeje kuko atazaguma ku butegetsi kugeza ku myaka 100.

Intsinzi ya Putin yari yitezwe cyane ndetse abatari bake bakemeza ko amajwi azagira aziyongera ugereranyije na 64% yari yagize mu 2012. Ibi babishingiraga ko uwo bari bahanganye cyane, Alexei Navalny, yangiwe kwiyamamaza. Uwasigaye bahanganye Pavel Grudinin, yagize amajwi 12%.

Uwitwa Ksenia Sobchak, wahoze akora kuri Televiziyo yagize amajwi 2% naho Vladimir Zhirinovsky agira 6%.

Icyakora itsinda ry’ubugenzuzi, Golos, ryatangaje ko hari ibitaragenze neza muri aya matora birimo kuba hari impapuro z’amatora zasanzwe mu dusanduku mbere y’uko amatora atangira, indorerezi zangiwe kwinjira ahaberaga amatora, bamwe bahatirwa gutora ku ngufu n’ibindi.

Gusa Komisiyo y’amatora ivuga ko nta kibazo gikomeye bigeze bahura na cyo, kandi ibintu byose byanyuze mu mucyo no mu bwisanzure.

PNG - 362.9 ko
Aha Perezida Vladimir Putin yari amaze gutora

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo