Perezida Kagame yasezeranyije Abanyafurika inyungu nyinshi mu isoko rihuriweho n’ibihugu bya Afurika

Perezida wa Repubulika y’u Rwanda Paul Kagame yavuze ko umushinga wo gushyiraho Isoko Rimwe ku bihugu bya Afurika ndetse no guha abanyafurika bose uburenganzira busesuye bwo gutembera ku mugabane ntacyo bishisha ari ibimenyetso bifatika bigaragaza ahazaza heza h’uyu mugabane.

Umukuru w’igihugu yabigarutseho mu ijambo rifungura Inama ya 10 Idasanzwe y’Umuryango w’Ubumwe bwa Afurika iri kubera i Kigali, yasinyiwemo amasezerano ashyiraho isoko rihuriweho muri Afurika, ‘Continental Free Trade Area (CFTA).

Iyi nama idasanzwe yitabiriwe n’abakuru b’ibihugu na za Guverinoma barenga 26 barimo Mahamadou Issoufou wa Niger, Perezida Emmerson Mnangagwa wa Zimbabwe, Perezida wa Komisiyo ya AU, Mousa Faki Mahamat, Perezida wa Africa y’Epfo Cyril Ramaphosa n’abandi.

Perezida Kagame yavuze ko amasezerano y’amateka amaze igihe kinini atekerezwaho, aho Isoko Rihuriweho ryatangiye gutekerezwa mu myaka 40 ishize mu igenamigambi ryavuye mu nama yabereye i Lagos, rikemezwa n’abakuru b’ibihugu muri 1980.

Yavuze ko gushyiraho Isoko Rimwe no kwemerera Abanyafurika gutembera ku mugabane wabo ntacyo bishisha ari ikimenyetso gikomeye gishimangira inzira iganisha ku bumwe bwa Afurika, anaboneraho kubasezeranya uburumbuke mu bihe biri imbere.

Ati “Isezerano duhaye abanyafurika ni uburumbuke, kuko mu gushyiraho Isoko Rimwe ndetse no kubemerera gutembera ku mugabane wabo ntacyo bishisha, turimo guharanira ubuhahirane bw’iby’iwacu muri Afurika.”

Yakomeje agira ati “Inyungu kandi ziri no mu bucuruzi dukorana n’iyindi migabane, tuzaba kandi turi mu mwanya mwiza wo guhuza imbaraga no gushimangira ubumwe bwacu tugaharanira inyungu zacu ku ruhando mpuzamahanga.”

Umwanzuro wo gushyiraho aka karere kiswe ‘Continental Free Trade Area (CFTA) wafashwe n’inama y’abakuru b’ibihugu muri Kamena 2015, ukaba umaze igihe uganirwaho byimbitse na ba minisitiri bashinzwe ubucuruzi mu bihugu bigize AU.

Umuyobozi wa Komisiyo ya AU, Moussa Faki Mahamat, yavuze ko kwihuza kwa Afurika ari ingenzi asaba Abakuru b’Ibihugu n’izindi nzego bireba gushyigikira aya masezerano.

Yakomeje avuga ko hari impinduka nyinshi mu bucuruzi zirimo kubaho mu Isi bityo Afurika na yo igomba kugira icyo ikora kugira ngo yibone muri izo mpinduka, ntikomeze kuba insina ngufi mu ruhando mpuzamahanga.

Yagize ati “Turasaba ibihugu byose gusinya aya masezerano kugira ngo uyu mwaka uzajye kurangira yatangiye gushyirwa mu bikorwa kandi hakorwe ubukangumbaga buhagije ku bo bireba bose.”

Iri soko rizatuma kandi Afurika ijyana n’impinduka mu bucuruzi zikomeje kuba hirya no hino ku Isi, aha twavuga politiki ya Trump n’ukwikura mu Muryango w’Ubumwe bw’u Burayi k’u Bwongereza, kunoza imikoranire mu bucuruzi n’indi migabane no kongera amahirwe y’ishoramari n’ubucuruzi ku mugabane.

Ibihugu byinshi byamaze kumvikana kuri aya masezerano ndetse byiteguye kuyasinya. Icyakora hari ibihugu bitewe n’amategeko yabyo, byo bizabanza kujya kuganira n’inteko zishinga amategeko kugira ngo bisinye nyuma.

PNG - 558.5 ko
Perezida Kagame ubwo yasinyaga kuri aya masezerano ashyiraho isoko rihuriweho ku mugabane wa Afurika
PNG - 531.9 ko
Iyi nama yitabiriwe n’abakuru b’ibigugu basaga 26


@Umubavu.com



Tanga igitekerezo kuri iyi nkuru



Igitekerezo